Gjyms’Hana, aty ku arkitektura nis me një bisedë të thjeshtë dhe përfundon në një hapësirë që të njeh

Nga Adelina Onuzi/ Këtë herë, Business Key ndalet në një studio ku arkitektura nuk ka thjesht formë, por shpirt. “Gjyms’Hana” është emri që të ngacmon që në dëgjim të parë, por pas tij fshihet një filozofi që shkon përtej dizajnit të mureve. Është historia e Ana Gjymshana, arkitekte, grua, bijë dhe ndërtuese emocionesh përmes hapësirës.

 

View this post on Instagram

 

A post shared by Business Magazine Albania (@businessmag.al)

Pas vitesh përvoje brenda dhe jashtë Shqipërisë, Ana vendosi t’i japë formë një ideje që e kishte ndërtuar gjatë, një studio që mendon me klientin, jo për të. Jo më projekte standarde, por dizajne që lindin nga pyetje të vogla dhe të sinqerta, me cilën dorë hap frigoriferin? Çfarë dëshiron të shohësh sapo zgjohesh?

“Gjyms’Hana” nuk është zgjedhur rastësisht. Është një lojë me mbiemrin, por edhe një mënyrë për ta thjeshtuar të bukurën. Sepse, siç thotë vetë Ana, kur gjërat thjeshtohen, jetohen më bukur. Studioja mban gjysmën e emrit të saj, por të gjithë identitetin profesional dhe personal që ajo ka ndërtuar ndër vite, me përkushtim, dije dhe ndjeshmëri.

Për Anën, arkitektura është arti i të kuptuarit të përditshmërisë. Kur një hapësirë funksionon edhe në momentin më kaotik, atëherë është projektuar si duhet. Sepse për të, rehatia është më shumë sesa estetikë, është logjikë, ndjesi dhe kujdes ndaj detajeve që shumica i kalojnë pa i vënë re.

Në çdo projekt të “Gjysm’Hana”-s fshihet një ndjeshmëri e rrallë, trashëguar edhe nga lidhja e fortë me të atin, i cili mbolli dashurinë për artin tek e bija. Dhe sot, ajo dashuri merr formë në çdo hapësirë që kjo studio ndërton.

Gjyms’Hana është më shumë se një studio arkitekture, është një koncept jetese, një histori personale që kthehet në profesion dhe një trashëgimi që synon të jetojë ndër breza.