Një zbulim arkeologjik i jashtëzakonshëm në Shqipëri po kthehet në qendër të vëmendjes ndërkombëtare. Një vendbanim 8,000-vjeçar, i fshehur nën ujërat e Liqenit të Ohrit pranë fshatit Lin, konsiderohet si vendbanimi më i vjetër mbi liqen i zbuluar ndonjëherë në Evropë.
Në këtë lokalitet të vogël por të lashtë, arkeologët nga Shqipëria dhe Zvicra kanë zbuluar gjurmë të një komuniteti të organizuar gjuetarësh dhe bujqsh, të cilët kanë jetuar mbi platforma druri të ndërtuara direkt mbi sipërfaqen e ujit, një mënyrë jetese shumë përparimtare për kohën.
Mbi 100,000 kolona druri, të përdorura për ndërtimin dhe mbrojtjen e vendbanimit, janë gjetur të ruajtura në mënyrë të jashtëzakonshme, ndërsa analizat e specializuara kanë datuar strukturat midis 6000 dhe 5800 p.K. Po ashtu, janë gjetur vegla bakri, fragmente kafshësh, fara dhe objekte të tjera që tregojnë një mënyrë jetese të zhvilluar dhe të qëndrueshme.
“Ky është ndoshta vendbanimi më i fortifikuar i këtij lloji në Evropë, me një sistem mbrojtës të përbërë nga mijëra hunj druri,” – tha Albert Hafner, profesor i arkeologjisë në Universitetin e Bernit.
Sipas arkeologut shqiptar Adrian Anastasi, ndërtimi i një vendbanimi të tillë mbi liqen kërkonte njohuri teknike të jashtëzakonshme dhe përgatitje të kujdesshme. Ai shton se zbulimi ka nisur prej më shumë se 6 vitesh, por vetëm 1% e territorit të përgjithshëm është eksploruar deri tani, ndërsa punimet pritet të vazhdojnë për dekada të tjera.
Ky zbulim jo vetëm që hedh dritë mbi jetën e hershme neolitike në Ballkan, por gjithashtu e vendos Shqipërinë në hartën e rëndësishme të arkeologjisë evropiane.
Reuters
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
