Nëse mendoni se paratë dhe inteligjenca janë e vetmja gjë që ju duhet të jeni të suksesshëm, mendoni përsëri.
Sipas sipërmarrësit Jim Cantrell, i cili ka punuar me Elon Musk si pjesë e ekipit themelues të SpaceX, këta dy faktorë përbëjnë një pjesë të vogël të asaj që duhet për të arritur sukses të jashtëzakonshëm.
“Inteligjenca është më shumë një mjet që ju mundëson të jeni të suksesshëm sesa vetë një përbërës”, shkruan Cantrell.
Megjithëse Cantrell nuk është më i punësuar në SpaceX, vitet e tij të përvojës duke këshilluar miliarderët dhe kompanitë e teknologjisë së bashku me punën e tij të gjerë me Musk, me sa duket i kanë mësuar se çfarë është suksesi i vërtetë.
Suksesi, shkruan ai, mbështetet në një “formulë të vetme të thjeshtë” që bazohet në tri gjëra, për të cilat Bill Gates, Mark Cuban dhe Jeff Bezos duket se bien dakord gjithashtu:
- Pasioni
Bëni atë që keni pasion në jetë. “Pa pasion, ju nuk mund ta doni punën tuaj dhe kurrë nuk mund të jeni më i miri ose të jeni më mirë se të tjerët”, shkruan Cantrell.
Njerëz të tjerë shumë të suksesshëm e kanë thënë të njëjtën gjë. Në një seksion me pyetje-përgjigje në ABC.net, bashkëthemeluesi i Microsoft, Bill Gates thotë: “Nëse je me fat kur je shumë i ri, bëj diçka për të cilën je i pasionuar. Këtë bëra unë kur isha 13 vjeç. Mësova për kompjuterët dhe për produktet softuerike.”
- Talenti
“Bëni diçka që dini ta bëni mirë ose keni talent për të”, shkruan Cantrell. Duke bërë një punë që është e vështirë dhe në të cilën keni mungesë aftësish, ju do të jeni në disavantazh me njerëzit më të talentuar brenda së njëjtës fushë, shpjegon ai.
Sipërmarrësi miliarder Mark Cuban thotë gjithashtu se prirjet dhe përpjekjet janë shpesh ato që çojnë në pasion. Ai e përdor veten si një shembull.
Një nga punimet e para të kolegjit të miliarderit ishte shitja e softuerit në një dyqan, gjë që kërkonte që ai të mësonte se si përdorej një sistem kompjuterik. Megjithëse Cuban nuk kishte bërë pothuajse asnjë kurs lidhur me teknologjinë, sipërmarrësi e mësoi veten se si të përdorte softuerin dhe duke vepruar kështu, ra në dashuri me teknologjinë kompjuterike.
“Mund të punoja shtatë apo tetë orë pa menduar për pushim”, shkruan ylli i “Shark Tank”. “Në këtë moment kuptova se unë mund të jem shumë, shumë i mirë në teknologji.”
“Kur jeni të mirë në diçka, të apasionuar dhe punoni shumë për të shkëlqyer dhe të jeni më i miri në atë që bëni, ndodhin gjëra të mira”, thekson Cuban.
- Vlera
“Ju mund të keni idenë më të mirë në botë dhe entuziazmin më të madh në lidhje me të, por nëse askush nuk e pëlqen, atëherë është një gjë pa vlerë”, thotë Cantrell.
“Bëni diçka që krijon vlerë dhe mund të shitet në një treg aktual apo të ardhshëm,” këshillon sipërmarrësi.
Themeluesi i Amazon, dhe tani personi më i pasur në botë, Jeff Bezos e përshkruan këtë teori. Gjigandi i shitjes me pakicë ishte në gjendje të zgjerohej kaq shpejt, sepse Bezos ofroi një shërbim që klientët e konsideronin të vlefshëm: një koleksion i gjerë i produkteve në një platformë të përshtatshme online.
Kur Amazon ia filloi, kompania shiste vetëm libra. Menjëherë pas kësaj, Amazon filloi të shiste muzikë dhe video. Duke kërkuar që të zgjeronte biznesin e tij, Bezos iu drejtua klientëve për të vlerësuar se çfarë donin të blinin.
“Ne jemi gjithmonë të përqendruar tek klienti, duke punuar për nevojat e tij, duke zhvilluar aftësi të reja, në mënyrë që të kënaqim atë që ne e perceptojmë si nevojë e ardhshme e klientëve”, thotë Bezos.
Nëse i kombinoni këto tre elemente në përpjekjet tuaja në jetë, do të jeni shumë të suksesshëm dhe paratë do të vijnë vetë.
CBNC
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
