Shqipëria ka humbur katër vende në krahasim me një vit më parë sa i përket renditjes në Indeksin Botëror të Sipërmarrjes të hartuar nga Instituti për Sipërmarrjen dhe Zhvillimin (GEDI) me seli në Uashington.
Për vitin 2017 vendi është renditur i 80-i (në 2016 mbajti vendin e 76). Shqipëria lë pas vende si Egjipti, që renditet në vendin e 81, Bullgarinë në vendin e 82 si edhe Armeninë, Iranin, Ganën. Ndërsa në vendin e fundit, në të 137-in u rendit Çadi. Vetëm një vend sipër nesh gjendet Serbia (79). Fqinji, Maqedonia, renditet në vendin e 64-t, ndërsa Mali i Zi në vendin e 61. Greqia në këtë renditje mban vendin e 49, kurse Italia renditet pak më lartë, në vendin e 46-të.
Vendi i parë sa i përket Indeksit të Sipërmarrjes për vitin 2017 i takon SHBA-së, e cila ndiqet nga Zvicra, Kanadaja, Suedia dhe Danimarka që përbëjnë peshën më të mirë. Raporti i GEDI-t nënvizon se sipërmarrja është një motor i rëndësishëm i zhvillimit të ekonomisë. Pa të nuk do të kishte inovacion, produktiviteti do të rritej me ritme të ulëta dhe vendet e punës gjithashtu do të ishin të pakta.
Sipërmarrja ekziston në kontekstin e veçantive gjeografike, lokale, kombëtare dhe ndërkombëtare. Përzierja e sjelljeve, burimeve dhe infrastrukturës, citon raporti, përbën atë që njihet si “ekosistemi”.
Indeksi Botëror i Sipërmarrjes mat çdo vit shëndetin e këtij ekosistemi në 137 vende. Krahason performancat e vendeve, si dhe ofron një panoramë sesi një vend performon në kontekstin lokal dhe në atë ndërkombëtar. GEDI mbledh të dhëna mbi qëndrimet e sipërmarrjes, aftësitë dhe aspiratat e popullsisë lokale dhe pastaj mat peshën që ato kanë në mjedisin e “infrastrukturës” sociale dhe ekonomike. Ky proces krijon 14 ‘shtyllat’ mbi të cilat matet shëndeti rajonal i ekosistemit.
Burimi: acp.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
