Besimi, një nga shtyllat kryesore të suksesit në biznes, nuk është diçka që imponohet, por që fitohet. Si mund ta kultivojmë këtë vlerë thelbësore, veçanërisht kur jemi në hapat e para të ndërtimit të një kompanie?
Pikërisht për këtë temë foli Dr. Adam Bandelli, psikolog organizativ dhe themelues i firmës konsulente “Bandelli & Associates”, në një intervistë për Foundr Magazine. Ai ka trajnuar liderë dhe sipërmarrës të nivelit të lartë dhe ka ndarë pesë parime të njohura si “5 C-të e Besimit”, të cilat janë kyçe për krijimin e një kulture që mbështetet mbi besimin.
Lexo gjithashtu: “ChatGPT na ka shpëtuar lidhjen”: Njihuni me çiftet që paguajnë AI për të “arbitruar” romancën e tyre!
Rruga e Bandellit drejt psikologjisë së biznesit nisi nga fushat e basketbollit. Si adhurues i Magic Johnson, Larry Bird dhe Michael Jordan, ai u frymzua nga arti i drejtimit dhe puna në ekip. Kjo e çoi të hulumtonte më thellë mbi aftësitë e lidershipit, duke studiuar sjelljen humane në mjedisin e punës. Me diplomë në psikologji organizative dhe një karrierë në konsulencë, ai krijoi një metodologji unike mbi “Inteligjencën Relacionale”, aftësinë për të krijuar dhe ruajtur marrëdhënie të forta në biznes.
5 C-të e Besimit
Sipas Bandellit, liderët më të suksesshëm nuk e imponojnë besimin, por e fitojnë atë. Kjo arrihet duke përvetësuar pesë parime thelbësore:
1-Kompetenca
A ke aftësitë dhe njohuritë e duhura për ta kryer punën?
2-Angazhimi
A je i përkushtuar ndaj vizionit dhe objektivave të organizatës?
3-Konsistenca
A paraqitesh vazhdimisht në punë me të njëjtën nivel profesionalizmi?
4-Karakteri
A vepron me integritet dhe etikë, duke qenë një shembull pozitiv për të tjerët?
5-Guximi
A ke kurajën të diskutosh temat më të rëndësishme dhe të vësh në diskutim vendimet e vështira?
Të pesta këto parime bazohen në dy elementë kryesorë, autenticiteti dhe qëllimi i qartë. Lidershipi i vërtetë nuk lidhet vetëm me inteligjencën emocionale, por edhe me krijimin e mjediseve të besueshme dhe të hapura për bashkëpunim.
Lexo gjithashtu: TikTok pritet të kalojë 30 miliardë dollarë pavarësisht një viti të komplikuar përpara
Mësimet për sipërmarrësit e rinj
Për ata që sapo nisin rrugën e sipërmarrjes, ndërtimi i një ekipi të suksesshëm varet nga vlerat që përfaqësojnë dhe nga aftësia për të krijuar një kulturë besimi.
“Liderët që janë të vetëdijshëm dhe të fokusuar në zhvillimin e stafit të tyre janë ata që arrijnë ta mbajnë ekipin e tyre të bashkuar dhe të motivuar”, thotë Bandelli.
Në fund të ditës, besimi nuk fitohet me fjalë, por me vepra. Për një lider, ai është valuta më e vlefshme në botën e biznesit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
