Samsung Electronics njoftoi se ka nënshkruar një marrëveshje për të blerë të gjitha aksionet e FläktGroup, një nga ofruesit kryesorë globalë të zgjidhjeve HVAC, për një shumë prej 1.5 miliardë euro nga firma evropiane e investimeve Triton. Me rritjen e shpejtë që po përjeton tregu global i sistemeve HVAC të avancuara, kjo blerje përforcon angazhimin e Samsung për të zgjeruar dhe fuqizuar aktivitetin e saj në këtë sektor.
“Përmes përvetësimit të FläktGroup, një specialist në sistemet e aplikuara HVAC, Samsung Electronics ka hedhur bazat për t’u bërë një lider global në këtë fushë, duke ofruar një gamë të plotë zgjidhjesh për klientët tanë,” deklaroi TM Roh, Drejtues i përkohshëm i Divizionit Device eXperience (DX) në Samsung Electronics. “Angazhimi ynë është të vazhdojmë të investojmë dhe zhvillojmë sektorin HVAC me potencial të lartë rritjeje, si një motor të rëndësishëm për zhvillimin tonë të ardhshëm.” Me seli në Herne, Gjermani, FläktGroup gëzon mbi një shekull përvoje teknologjike dhe kapacitetesh të avancuara projektimi, duke ofruar produkte dhe zgjidhje të personalizuara sipas nevojave të klientëve. Kompania furnizon sisteme HVAC me efikasitet të lartë dhe besueshmëri të madhe për një gamë të gjerë objektesh dhe ndërtesash, përfshirë qendrat e të dhënave që kërkojnë ftohje të qëndrueshme, muze dhe biblioteka me koleksione të ndjeshme historike, aeroporte me fluks të madh pasagjerësh dhe spitale të mëdha ku kontrolli i temperaturës, lagështisë dhe higjienës është vendimtar. Në tregun global të qendrave të mëdha të të dhënave, FläktGroup ka arritur një nivel të lartë vlerësimi tek klientët përmes performancës së produkteve, besueshmërisë dhe mbështetjes teknike, duke shënuar rritje të konsiderueshme të të ardhurave gjatë tre viteve të fundit. Zgjidhjet e tij për qendrat e të dhënave përfshijnë produkte lider në industri për ftohjen me ajër dhe ftohjen me lëng, që ndihmojnë klientët të reduktojnë konsumin e energjisë dhe të përmbushin objektivat për uljen e emetimeve të karbonit.
Vitin e kaluar, FläktGroup u vlerësua me çmimin “Innovation of the Year Award” në ceremoninë DCS Cooling Awards, si vlerësim për teknologjitë e tij të avancuara dhe inovative. “Jemi jashtëzakonisht të kënaqur që FläktGroup i bashkohet Samsung Electronics. Si një specialist global në fushën HVAC me mbi një shekull përvojë, FläktGroup është besuar nga klientë të mëdhenj ndërkombëtarë për inovacionin teknologjik dhe cilësinë e produkteve,” tha Trevor Young, CEO i FläktGroup. “Tani, me mbështetjen dhe praninë globale të Samsung Electronics, presim të përshpejtojmë më tej ritmin tonë të rritjes.” Përveç qendrave të të dhënave, FläktGroup ka ndërtuar një portofol të larmishëm me mbi 60 klientë të mëdhenj, përfshirë kompani lidere në sektorin farmaceutik, bioteknologji, ushqimor, të pijeve, si edhe qendra industriale të mëdha.
Lexo edhe:Samsung prezanton linjën AV 2025 me Samsung Vision AI!
Samsung investon në sektorin HVAC si motor kyç për zhvillimin e ardhshme
Industria HVAC pritet të vijojë rritjen e saj, e nxitur nga kërkesa për zgjidhje inovative dhe me efikasitet energjetik që përmirësojnë cilësinë e ajrit dhe kontrollin e temperaturës e lagështisë, duke siguruar komoditet dhe siguri për përdoruesit. Samsung do të vazhdojë të investojë në këtë sektor strategjik, duke ndërmarrë kohët e fundit investime dhe blerje në fusha si robotika, teknologjitë mjekësore dhe pajisjet audio për konsumatorë – si pjesë e angazhimit të tij për t’u zgjeruar në sektorë të rinj me potencial të lartë zhvillimi. Sipas disa parashikimeve nga kërkime të pavarura të tregut, tregu i zgjidhjeve të aplikuara HVAC pritet të rritet nga 61 miliardë dollarë në vitin 2024 në 99 miliardë dollarë deri në vitin 2030, me një normë mesatare vjetore rritjeje prej 8%. Ndërkohë, tregu i ftohjes për qendrat e të dhënave parashikohet të rritet me një ritëm më të shpejtë – me 18% në vit. Segmenti i qendrave të të dhënave paraqet barriera të larta hyrjeje, duke kërkuar përvojë globale në furnizim dhe kapacitet për të ofruar dizajne dhe zgjidhje optimale për klientët. Përmes blerjes së FläktGroup, Samsung parashikon një rritje të qëndrueshme të kërkesës për qendra të të dhënave, si rezultat i përhapjes së teknologjive të tilla si inteligjenca artificiale gjenerative, robotika, drejtimi autonom, realiteti i shtuar dhe realiteti i zgjatur (XR). Gjithashtu, zgjidhja e integruar e kontrollit të ndërtesave të Samsung (b.IoT) së bashku me platformën e kontrollit HVAC të FläktGroup (FläktEdge), do të ofrojnë një paketë të plotë për menaxhimin e energjisë dhe klimës së ndërtesave, përmes së cilës kompania pret të zgjerojë edhe më tej shërbimet e saj të mirëmbajtjes dhe asistencës teknike. Samsung ka zgjeruar vazhdimisht biznesin e tij HVAC me fokus te sistemet pa kanale ajrimi (ductless), duke ofruar kondicionerë për përdorim rezidencial dhe komercial. Në maj të vitit 2024, kompania krijoi një sipërmarrje të përbashkët me Lennox International Inc. për të forcuar pozicionin në tregun HVAC të Amerikës së Veriut, duke shtuar rrjetin e shpërndarjes së Lennox në kanalet ekzistuese të shitjeve të Samsung. Përfundimi i transaksionit pritet të realizohet brenda vitit 2025.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
