Sa është pasuria juaj neto dhe pse është e rëndësishme ta dini?

Shpesh, kur dëgjojmë fjalën “pasuri neto”, mendja na shkon menjëherë te yjet e Hollivudit apo gjigandët e teknologjisë me miliona dollarë në llogari bankare. Por e vërteta është se pasuria neto nuk është një term i rezervuar vetëm për të pasurit, përkundrazi, është një koncept thelbësor për këdo që dëshiron të kuptojë ku ndodhet sot financiarisht dhe ku po shkon.

Sipas CNBC Select, “ndjekja e pasurisë neto me kalimin e kohës është një tregues i rëndësishëm i stabilitetit financiar, sepse ju ndihmon të kuptoni se ku kanë shkuar paratë tuaja në të kaluarën dhe si mund t’i menaxhoni më mirë në të ardhmen”.

Çfarë është saktësisht pasuria neto?

Sipas Investopedia, pasuria neto është diferenca mes aseteve që zotëroni dhe detyrimeve që keni. Me fjalë më të thjeshta, gjithçka që keni, minus gjithçka që i detyroheni të tjerëve. Dhe, ndoshta çuditërisht, të ardhurat mujore nuk janë pjesë e këtij përllogaritjeje.

Pra, mund të keni një pagë të lartë, por nëse shpenzoni çdo qindarkë dhe jeni të mbuluar nga borxhet, pasuria juaj neto mund të jetë shumë e ulët, madje edhe negative. Ndërkohë, dikush me një të ardhur modeste, që investon me zgjuarsi dhe kursen me mençuri, mund të ketë një pasuri neto të admirueshme.

Çfarë përfshihet në përllogaritjen e pasurisë neto?

Asetet përfshijnë:

-Llogaritë bankare (rryma dhe kursimi)

-Kursimet për pension

-Vlera e tregut e pasurive të paluajtshme që zotëroni

-Vlera e makinave që keni në pronësi

-Aksione, obligacione dhe investime të tjera

-Objekte me vlerë: bizhuteri, art, koleksione

-Polica sigurimesh me vlerë të kthyeshme

-Vlera e një biznesi që zotëroni (ose pjesëmarrje në një biznes)

Detyrimet përfshijnë:

• Kredi për shtëpinë (hipotekat)

• Kredi personale ose për automjete

• Kredi studentore

• Bilanca në karta krediti

• Çdo borxh tjetër që keni

Si përllogaritet pasuria juaj neto?

Formula është e thjeshtë:
Pasuria Neto = Asetet – Detyrimet

Por për ta zbatuar këtë formulë, duhet të bëni pak “inventar” të pasurisë dhe borxheve tuaja. Merrni shënim çdo pasuri që keni (nga kursimet, te prona, makinat dhe investimet), pastaj listoni borxhet. Tregohuni realist dhe korrekt me shifrat.

Shembull praktik:
Le të themi se pasuritë tuaja (kursime, shtëpi, makinë, fond pensionesh) kapin vlerën e 400,000 eurove. Nga ana tjetër, keni një hipotekë, një kredi makinash dhe disa borxhe të tjera që arrijnë në 150,000 euro.

400,000 – 150,000 = 250,000 euro pasuri neto.

Pse është kaq e rëndësishme të njohim këtë shifër?

Njohja dhe ndjekja e pasurisë neto ju jep një pamje të plotë të situatës suaj financiare. Ajo nuk mat vetëm sa para keni sot, por sa vlen realisht gjendja juaj financiare.

Është një mënyrë për të kuptuar nëse po ecni në drejtimin e duhur, nëse po ndërtoni një bazë të qëndrueshme për të ardhmen dhe, më e rëndësishmja, nëse vendimet tuaja financiare të përditshme po i shtojnë apo po i shkurtojnë pasurisë suaj.

Në një kohë kur gjithçka zhvillohet me shpejtësi dhe tregjet lëkunden përditë, të dish sa vlen në të vërtetë është forma më e mirë për të ndërtuar siguri, jo vetëm për veten, por edhe për të ardhmen që po ndërtoni.

THE WEEK