Ndërsa gjithnjë e më shumë aplikacione po integrojnë Inteligjencën Artificiale për të tërhequr përdorues dhe për të rritur të ardhurat, një raport i ri tregon se kjo nuk garanton sukses në afat të gjatë.
Sipas raportit “State of Subscription Apps 2026” të kompanisë RevenueCat, aplikacionet me AI kanë vështirësi më të mëdha për të mbajtur abonentët, pasi përdoruesit anulojnë abonimet e tyre rreth 30% më shpejt krahasuar me aplikacionet që nuk përdorin AI.
Raporti bazohet në analizën e mbi 1 miliard transaksioneve brenda aplikacioneve, të menaxhuara përmes platformës RevenueCat nga më shumë se 75 mijë zhvillues, që gjenerojnë mbi 11 miliardë dollarë të ardhura në vit.
Aktualisht, vetëm 27.1% e aplikacioneve në ekosistem janë të klasifikuara si aplikacione me AI, ndërsa pjesa më e madhe, 72.9%, nuk përdorin ende këtë teknologji. Aplikacionet në kategorinë Foto & Video kanë përqindjen më të lartë të integrimit të AI, ndërsa gaming, travel dhe business mbeten më pak të ndikuara.
Të dhënat tregojnë se aplikacionet me AI performojnë më dobët në mbajtjen e të abonuarve. Pas një viti, vetëm 21.1% e përdoruesve mbeten abonentë, krahasuar me 30.7% për aplikacionet pa AI. Edhe në nivel mujor, normat e mbajtjes janë më të ulëta për aplikacionet me AI.
Një tjetër tregues është edhe niveli më i lartë i rimbursimeve: aplikacionet me AI kanë rreth 20% më shumë kërkesa për kthim pagese, çka tregon se disa produkte nuk arrijnë të përmbushin pritshmëritë e përdoruesve.
Megjithatë, raporti evidenton edhe disa avantazhe. Aplikacionet me AI arrijnë të konvertojnë përdoruesit nga provë falas në abonim me pagesë 52% më mirë dhe gjenerojnë më shumë të ardhura për përdorues në krahasim me aplikacionet tradicionale.
Në përfundim, raporti sugjeron se AI ndihmon në monetizimin e shpejtë të aplikacioneve, por sfida kryesore mbetet krijimi i një vlere të qëndrueshme që i bën përdoruesit të qëndrojnë për një kohë më të gjatë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
