Qeveria shqiptare planifikon rritje rrogash për mësuesit, mjekët dhe policët. Shtohet edhe fondi social

Qeveria shqiptare ka konsultuar projektligjin e Buxhetit, ndërsa ministrat kanë prezantuar ato që i kanë quajtur lajme të mira për punonjësit e adminsitratës.

Për policët, mësuesit, rojet e burgut dhe mjekët pritet të ketë rritje rroge në vitin e ardhshëm, ndërsa do të shtohet edhe fondi social.

Ministri i Brendshëm, Çuçi njoftoi rritjen e pagave për një kategori të policisë së shtetit. Bëhet fjalë për punonjësit që ushtrojnë detyrën jashtë vendbanimit në formën e bonusit dhe do ta çojë deri në 150 % pagën e punonjësve.

Ministrja e Financave dhe Ekonomisë, Delina Ibrahimaj nuk dha një përgjigje të qartë nëse buxheti i vitit 2022 përfshin apo jo rritje të pensioneve për pensionistët.Por nga ana tjetër ajo garantoi të gjithë pensionistët se çdo vit do të jetë i garantuar bonusi i pensioneve.

Ministri i Drejtësisë, Ulsi Manja ka bërë të ditur se në projektbuxhetin e vetit 2022 është parashikuar edhe rritja e pagave për punonjësit e policisë së burgjeve, duke i barazuar për gradë dhe funksion me punonjësit e Policisë së Shtetit.

Ndërkohe ministrja Ogerta Manastirliu u shpreh se:

“Programi i ndihmës ekonomike si një mburojë për të gjithë familjet në vështirësi ekonomike. Do të ketë një rritje të masës së ndihmës ekonomike për të gjithë familjet përfituese në masën 10%. Do të ketë politika të shënjestruara për familje të cilat përfitojnë nga program i ndihmës ekonomike dhe janë familje me mbi 3 fëmijë nën 18 vjeç, do të ketë një rritje të ndihmës ekonomike, pra të masës me 2 herë.

Do të ketë një rritje dhe mbështetje përsa i përket pagave për personelin mjekësor. Ne do të vijojmë me rritjen e pagave dhe në vitin 2022 do të rrisim me 6% të rritjes së pagës për personelin mjek infermier në të gjithë sistemin shëndetësor.”