Pse po vonohet kaq shumë Apple për të zhvilluar inteligjencën artificiale?

Në qershorin e kaluar, Apple premtoi një “epokë të re” me një Siri të rilindur, një asistent virtual që do të dinte të lexonte emailet, të koordinonte mesazhet dhe të rezervonte darkën pasi të kontrollonte orarin e fluturimit. Një Siri që më në fund do të kuptonte njeriun. Por… vizioni është ende më shumë ëndërr sesa realitet.

Lexo gjithashtu: Risia e Audi – Hapni dhe mbyllni dyert me iPhone ose Apple Watch!

Në fillim të marsit, Apple zyrtarisht shtyu për një tjetër vit përditësimin e shumëpritur të Sirit që do e bënte më inteligjent dhe më të ndërveprueshëm me të dhënat personale. Një lëvizje që ndezi alarmin në zyrat e Apple dhe shtoi dyshimet se kompania mund të jetë duke humbur terren në garën globale për AI.

Në një botë ku inteligjenca artificiale po konsiderohet “revolucioni i radhës i internetit”, Apple ndodhet në një moment delikat, me presionin për të sjellë diçka më shumë sesa një iPhone të ri çdo shtator.

Lexo gjithashtu: Apple po planifikon të ndërtojë një iPhone pa asnjë portë karikimi

Siri që s’po flet siç duhet

Shkaku i shtyrjes? Teknologjia thjesht nuk është gati. Një zëdhënëse e Apple tha se “do të na duhet më shumë kohë nga sa kishim menduar.” Ndërkohë, konkurrentët nuk po presin, Google me Gemini, Amazon me Alexa+ dhe Samsung me funksione të reja të personalizuara po e ngushtojnë rrethin rreth Apple.

Në fakt, drejtuesi i departamentit të Sirit në Apple e ka quajtur këtë vonesë “të shëmtuar” dhe “të turpshme”, sipas Bloomberg. Për një kompani që është mësuar të jetë një hap përpara, ky është një realitet i ri.

Lexo gjithashtu: iPhone-i i parë me ekran të palosshëm nga Apple mund të lançohet deri në 2026 dhe do kushtojë rreth $2,500

Nga Kina, me telashe

Problemet nuk ndalen me Sirin. Shitjet në Kinë ranë me 11% vit pas viti dhe pjesë të konsiderueshme të zinxhirit të prodhimit ndodhen në një territor gjithnjë e më të pasigurt për shkak të tarifave tregtare. Ndërkohë, aksionet e Apple kanë rënë me rreth 12% këtë vit, duke shkaktuar shqetësime në Wall Street.

Gjithsesi, analistët ende nuk shpallin alarm për fundin e Apple. Me një bazë përdoruesish që është e pakrahasueshme dhe një iPhone që mbetet “mjet jetik”, Apple ka ende një avantazh të qartë.

“Smartfoni është kthyer në një produkt bazë për konsumatorët. Dhe aty Apple është mbret,” thotë Barton Crockett nga Rosenblatt Securities.

A do ta fitojë Apple garën për AI?

Historikisht, Apple nuk është parë si inovatori më i shpejtë, por si kompania që rafinon më mirë se të gjithë. Kur të tjerët garojnë për të dalë të parët, Apple pret, mëson dhe sjell një version që thjesht “funksionon”. Por në kohën e AI, pritja mund të ketë kosto.

Ndërkohë që gjigandët e tjerë teknologjikë prezantojnë veçori të reja çdo muaj, Apple po përgatit një version të ri të Siri-t, që sipas premtimeve do të jetë më personal, më i zgjuar dhe më bashkëpunues. Po pse po vonohet? Sepse një dështim i AI mund të jetë katastrofik për reputacionin e Apple. Mjafton të kujtojmë gafat e Google dhe Meta për të kuptuar pse Apple po ecën me kujdes.

Dhe çfarë vjen më pas?

Edhe pse iPhone mbetet pjesa më e rëndësishme e biznesit të Apple, pyetja e madhe është: Cili është hapi tjetër? Tregu kërkon një produkt të ri që të ndezë emocionin, një lloj “iPhone moment” për epokën e AI. Dhe ende, Apple nuk e ka dhënë këtë surprizë.

Megjithatë, raportimet sugjerojnë se këtë vit mund të vijë një iPhone më i hollë, ndoshta për të ringjallur njëfarë magjie të vjetër. Në sfond, ndërtohet ngadalë “Apple Intelligence”, tentativa për të ndërtuar një Siri që më në fund na kupton.

Nëse do t’ia dalë? Koha do ta tregojë. Por një gjë është e sigurt, për herë të parë pas shumë kohësh, Apple duket se nuk është më vetë loja, është thjesht një lojtar mes shumë të tjerëve. Dhe për një kompani që zakonisht shkruan rregullat e lojës, kjo është një sfidë e re.

CNN