Të dhënat e fundit të punësimit në Shtetet e Bashkuara tregojnë një fenomen interesant: mes janarit dhe korrikut 2025, rreth 212 mijë gra dolën nga tregu i punës, ndërkohë që në të njëjtën periudhë rreth 44 mijë burra hynë në të. Ky ndryshim në prirje ngre pyetje mbi arsyet pse gjithnjë e më shumë gra profesioniste dhe të suksesshme po zgjedhin të shkëputen nga karriera e tyre.
“Power Pause”: Një zgjedhje e vetëdijshme
Shkrimtarja Issie Lapowsky, në një analizë të botuar nga New York Times, sjell një fenomen të ri të quajtur “power pause”. Kjo nënkupton vendimin e një grupi grash të arsimuara dhe me karriera të konsoliduara për të ndërprerë përkohësisht punën ose për të kaluar në orar të pjesshëm. Shumë prej tyre e shohin këtë si një zgjedhje personale për të kaluar më shumë kohë me fëmijët, për të nisur një biznes të tyre ose për t’u fokusuar në prioritete të tjera jetësore.Ky vendim nuk është i njëjtë me rastet kur gratë detyrohen të lënë punën për shkak të kostove të larta të kujdesit për fëmijët apo humbjes së vendit të punës nga shkurtime. Përkundrazi, bëhet fjalë për një zgjedhje të vetëdijshme dhe shpesh të bazuar në mundësitë financiare dhe mbështetjen që ato kanë.
Lexo edhe:”’De-banking”, kur llogaria juaj mund të mbyllet pa paralajmërim
Pandemia e Covid-19 luajti një rol të rëndësishëm në këtë prirje. Periudha e punës nga shtëpia, fleksibiliteti i shtuar dhe koha e kaluar me familjen bënë që shumë gra të rishikonin marrëdhënien e tyre me karrierën. Studimet tregojnë se pas pandemisë është rritur numri i grave që identifikohen si nëna shtëpiake ose që punojnë me orar të reduktuar nga shtëpia.
Një raport i McKinsey dhe LeanIn theksonte se në vitet e fundit kompanitë kanë humbur në nivele rekord drejtues gra, si nëna ashtu edhe jo-nëna, të cilat kanë vendosur të shkëputen nga korporatat tradicionale. Shumë nga gratë që kanë marrë këtë vendim pranojnë se ai nuk ka qenë i lehtë. Përveç dilemes personale, ekziston edhe shqetësimi për ndikimin që ky fenomen mund të ketë në përfaqësimin e grave në pozicione drejtuese apo në përpjekjet për diversitet në vendin e punës. Një pjesë e tyre shprehen se duan të gëzojnë frytet e punës së tyre dhe të investojnë kohë në jetën personale, edhe pse kjo nënkupton një pauzë në karrierë. Një pyetje e shpeshtë që ngrihet është nëse këto gra do të rikthehen në tregun e punës dhe si do të pritet ky rikthim. Koncepti i “power pause” nënkupton që ky ndërprerje të shihet si një periudhë rritjeje dhe jo si një pengesë për karrierën. Nëse shoqëria dhe kompanitë do ta pranojnë këtë si një hap strategjik, rikthimi i tyre mund të jetë më i lehtë dhe më i vlerësuar.
Fenomeni i grave që zgjedhin të largohen përkohësisht nga puna është kompleks dhe i shumëanshëm. Për disa, është një akt fuqizimi dhe rivendosje e prioriteteve personale; për të tjera, është një pasojë e vështirësive strukturore si kostot e kujdesit për fëmijët apo mungesa e mbështetjes. Çfarë mbetet e qartë është se pandemia i dha shumë gra mundësinë të imagjinonin një mënyrë tjetër jetese – dhe sot, një numër gjithnjë e më i madh po e ndjek këtë rrugë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
