Mark Zuckerberg është padyshim një nga sipërmarrësit më të suksesshëm të kohës sonë, pavarësisht polemikave të shumta që e kanë shoqëruar. Bashkëthemeluesi i Facebook dhe CEO aktual i kompanisë mëmë, Meta, ka një pasuri të vlerësuar mbi 230 miliardë dollarë. Produktet e Metës përdoren çdo ditë nga rreth 3.35 miliardë njerëz gati 4 nga 10 persona në të gjithë botën.
A do të thotë kjo se kur një figurë kaq ndikuese si Zuckerberg shpreh dyshime për industrinë e arsimit, duhet ta marrim seriozisht? Ndoshta po. Gjatë një interviste në podcast-in This Past Weekend me komedianin dhe yllin e televizioneve realitet Theo Von, Zuckerberg foli hapur për mënyrën se si universitetet po përgatisin të diplomuarit e rinj. Ai u shpreh qartë: “Nuk jam i sigurt që universitetet po i përgatisin njerëzit për vendet e punës që kërkohen sot.” Për më tepër, ai e konsideron këtë një problem serioz dhe shtoi se “çështja e borxheve studentore është vërtet shqetësuese.” Zuckerberg theksoi se arsimi i lartë është tepër i kushtueshëm dhe shpesh nuk ofron garanci për punësim të suksesshëm pas diplomimit. “Universiteti është shumë i shtrenjtë për shumë njerëz dhe pastaj, sapo diplomohet, një student ngel me borxhe të mëdha pa pasur garanci se do të gjejë një punë të mirë.” Sipas tij, hendeku mes asaj që ofron arsimi dhe asaj që kërkon tregu i punës është bërë aq i madh, sa është e pashmangshme një “përballje e madhe” në këtë drejtim.
Ai gjithashtu solli në vëmendje një debat të hershëm: “Ndoshta jo të gjithë kanë nevojë të ndjekin universitetin,” tha ai, duke theksuar se ka shumë profesione që nuk kërkojnë diploma universitare. Sipas tij, shoqëria po e kupton këtë më tepër sot sesa një dekadë më parë. Gjithsesi, Zuckerberg nuk e mohoi plotësisht vlerën e universitetit. Ai tha se eksperienca e kolegjit ka edhe avantazhe të tjera: “Është një mënyrë e mirë për të mësuar si të jesh i rritur para se të hysh në botën reale.” Për të, orët mësimore ishin “në rregull” dhe një pjesë “argëtuese” e përvojës, por më e rëndësishmja ishte se gjatë universitetit takoi persona kyç në jetën e tij, si bashkëthemeluesit e Facebook dhe bashkëshorten e tij, Priscilla Chan.
Lexo edhe:Njihuni me “superfuqinë” që i mungon shumicës së adoleshentëve, gjumi i mjaftueshëm
Në këtë debat për vlerën e arsimit të lartë, duhet kujtuar se shumë sipërmarrës të tjerë të njohur kanë ndjekur rrugën e Zuckerberg. Steve Jobs (Apple) dhe Elon Musk (Tesla, SpaceX) janë shembuj të njohur që nuk përfunduan studimet universitare. Por, nga ana tjetër, një studim i vitit 2012 tregoi se shumica dërrmuese e CEO-ve në industrinë e teknologjisë në SHBA kishin përfunduar arsimin e lartë dhe mbi gjysma kishin edhe diploma pasuniversitare. Pra, historia e “gjeniut që braktis shkollën dhe krijon një perandori” mbetet më tepër një mit.
Megjithatë, debati se çfarë aftësish të vlefshme ofron sot universiteti mbetet i hapur. Në epokën e inteligjencës artificiale, ku teknologjia po përparon me ritme marramendëse dhe AI po zëvendëson shumë procese, arsimi tradicional ndoshta nuk po i ndjek më zhvillimet me të njëjtin ritëm. Madje diskutohet nëse mësoni kodim në mënyrë tradicionale është ende e nevojshme, kur AI tashmë mund të kryejë shumë nga këto detyra.
Zuckerberg nuk e përmendi drejtpërdrejt AI-n në këtë intervistë, por ai ka qenë shumë i hapur për përdorimin e saj në Meta, madje edhe për zëvendësimin e disa zhvilluesve me inteligjencë artificiale.
Pse ka rëndësi kjo për ne? Sepse teknologjia po transformon fuqinë punëtore globale dhe rregullat e lojës po ndryshojnë çdo ditë. Megjithëse arsimi universitar ka ende vlera të rëndësishme, ndoshta është koha që në përzgjedhjen e punonjësve të mos fokusohemi vetëm te diplomat, por edhe te aftësia për të mësuar vazhdimisht dhe për t’u përshtatur me një realitet gjithnjë e më të ndikuar nga AI.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
