Një ligj i ri i propozuar nga ministria e Shëndetësisë, parashikon vlerësimin e punës së papagur nga gratë dhe burrat, si një kontribut i rëndësishëm për ekonominë dhe shoqërinë e vendit.
Në draftin “Për barazinë gjinore”, të gjithë punëdhënësit, privat apo publik detyrohen të miratojnë rregulla dhe orare pune të reduktuara apo në distancë për gratë e burrat që kujdesen për familjarët. Projektligji detyron INSTAT që të publikojë çdo 4 vjet, anketën për përdorimin e kohës dhe punën e papaguar.
“Institucionet publike hartojnë dhe miratojnë politika për balancën punë-jetë duke nxitur pjesëmarrjen e grave në tregun e punës, ndërgjegjësimin për ndarjen e barabartë të përgjegjësive të kujdesit midis burrave dhe grave, marrë masa për eliminimin e hendekut gjinor në të ardhura dhe paga, si dhe zbatimin e tyre nga subjektet private. Punëdhënësit publikë dhe privatë rishikojnë rregullat e punësimit, dispozitat e kontratave individuale dhe kolektive të punës, me qëllim përfshirjen e rregullave për orare fleksibël dhe të reduktuara pune, si dhe kryerjen e punës në distancë”, thuhet në dokumentin në konsultim.
Puna e papaguar quhet kujdesi për mirëqenien e familjes, fëmijët, puna në bujqësi. Një propozim i draftit është edhe përputhja gjinore e titujve dhe gradave profesionale në certifikatë, diplomë, licencë, punime shkencore etj. P.sh një grua në drejtim të një ministrie do të referohet si “ministre” dhe jo ministër, siç shënohet momentalisht. I njëjti draft ndalet dhe tek ndikimi i medias në përhapjen apo kufizimin e diskriminimit gjinor. Aty thuhet se mediat duhet të ndalojnë transmetimin dhe publikimin e materialeve mediatike që përmbajnë gjuhë diskriminuese dhe dhunë me bazë gjinore.
Mediat duhet të marrin masa për eliminimin e përmbajtjeve të informimit publik dhe mediatik, përfshirë reklamat dhe përmbajtjet e mediave sociale, që krijojnë ose nxisin diskriminimin bazuar gjini dhe/ose dhunë me bazë gjinore. Të ndalojë gjuhën seksiste, stereotipet gjinore dhe të ndërgjegjësojë mbi barazinë gjinore.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
