Banka e Shqipërisë ka rritur normën bazë të interest për herë të parë pas 11 vitesh. Rritja e theksuar e çmimeve e ka nxitur Këshillin Mbikëqyrës të Bankës të rrisë normën bazë të interesit me 0.5 pikë përqindje, duke e çuar atë në nivelin 1%.
Vendimi i komunikuar nga Guvernatori i Bankës flet edhe për rritjen e normës së interesit të kredisë njëditore nga 0.9% në 1.9%. Mbetet e pandryshuar norma e interesit të depozitave njëditore, me 0.1%.
Sipas Guvernatori Gent Sejko, goditja inflacioniste që ka shkaktuar sulmi i Rusisë në Ukrainë do të jetë më e fortë dhe më afatgjatë krahasuar me projeskionet e mëparshme. Inflacioni pritet të jetë i lartë dhe sipër objektivit të Bankës së Shqipërisë, të paktën deri në fund të vitit të ardhshëm.
Ai theksoi se, “Përditësimi i parashikimeve afatmesme tregon se ekonomia shqiptare do të vuajë pasojat e goditjes. Rritja e çmimeve në tregjet botërore dhe reduktimi i kërkesës së huaj, do të shoqërohen me norma më të larta inflacioni dhe rritje më të ngadaltë ekonomike krahasuar me vlerësimet tona të mëparshme. Megjithatë, vlerësimet e skenarit bazë sugjerojnë se ekonomia shqiptare do të vijojë të rritet gjatë vitit 2022 dhe në afatin e mesëm”.
Projeksionet e BSH tregojnë se rritja ekonomike do të mbetet në territor pozitiv edhe në rast se goditja rezulton më e fortë se vlerësimet aktuale. Nga ana tjetër, goditjet e ofertës dhe qëndrueshmëria e kërkesës së brendshme pritet të pasqyrohen në norma më të larta inflacioni. Sipas skenarit bazë të parashikimeve, inflacioni do të luhatet rreth nivelit 5-6% për pjesën e mbetur të vitit 2022.
“Me qetësimin e pritur të tregjeve ndërkombëtare, inflacioni pritet të vijë në rënie gjatë vitit 2023 dhe të kthehet në objektiv në tremujorin e fundit të tij”, sipas Guvernatorit Sejko.
Edhe pse në rritje, norma bazë e interesit prej 1% vlerësohet të jetë stimuluese për rritjen e ekonomisë, punësimit dhe pagave. Guvernatori tha se, “në realitetin e ri të krijuar, ky qëndrim ofron një balancë më të mirë midis rrezikut të përshpejtimit të inflacionit dhe rrezikut të dëmtimit të rimëkëmbjes ekonomike”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
