Një ide që duket sikur ka dalë nga një film fantastiko-shkencor po qarkullon seriozisht në botën e teknologjisë. Një startup i quajtur R3 Bio po eksploron mundësinë e krijimit të “kloneve pa tru” të trupit njerëzor, ku një ditë njerëzit e moshuar apo të sëmurë mund të transferojnë trurin e tyre për të vazhduar jetën në një trup të ri.
Interesi për klonimin nuk është i ri. Që nga vitet ’90, shkencëtarët kanë eksperimentuar me klonimin e kafshëve, dhe rasti më i njohur mbetet ai i deles Dolly në vitin 1996. Megjithatë, kur bëhet fjalë për njerëzit, situata është shumë më e ndërlikuar. Deri më sot, shkenca ka arritur vetëm të krijojë modele embrionesh në laborator dhe të klonojë disa primatë, por jo qenie njerëzore të plota.
Në këtë kontekst, ideja e R3 Bio shkon një hap më tej. Fillimisht, kompania po zhvillon struktura biologjike pa tru, që përmbajnë organe dhe mund të përdoren për transplante ose kërkime. Por sipas disa raportimeve, ambicia reale është shumë më e madhe: krijimi i trupave të plotë njerëzorë pa tru, të cilët teorikisht mund të shërbejnë si “trupa të rinj” për individë të tjerë.
Argumenti kryesor pas kësaj ideje është se një trup pa tru nuk do të kishte vetëdije, duke shmangur një pjesë të dilemave etike. Megjithatë, kjo nuk e bën konceptin më pak të diskutueshëm. Përkundrazi, ai ngre pyetje të forta mbi kufijtë moralë të shkencës dhe mënyrën se si e kuptojmë jetën njerëzore.
Vetë kompania ka reaguar duke mohuar se ka plane konkrete për krijimin e kloneve njerëzore pa tru, duke theksuar se këto janë diskutime teorike për të ardhmen. Megjithatë, disa deklarata nga brenda ekipit sugjerojnë se ide të tilla janë pjesë e diskutimeve të tyre strategjike.
Nga ana tjetër, ekspertët janë shumë skeptikë. Ata theksojnë se përtej debateve etike, ekzistojnë edhe pengesa të mëdha teknologjike dhe biologjike. Një proces i tillë do të kërkonte zhvillime që sot ende nuk ekzistojnë, si për shembull mitra artificiale funksionale apo mënyra të sigurta për ndërhyrje kaq komplekse në trupin dhe trurin e njeriut.
Në fund, kjo histori qëndron diku mes shkencës dhe fantashkencës. Ajo tregon se sa larg mund të shkojë imagjinata dhe ambicia njerëzore, por edhe sa të rëndësishme janë kufijtë etikë në një epokë ku teknologjia po sfidon gjithnjë e më shumë vetë kuptimin e jetës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
