Një ditë frymëzuese ku dhjetëra vajza të reja patën mundësinë të mësonin se çfarë e bën një grua të suksesshme në Shqipërinë tonë të vogël. Seminari “Gruaja Shqiptare në Karrierë”, në moderimin e Armira Lazaj, njëkohësisht dhe ideatore e seminarit, mblodhi bashkë gra të suksesshme.
Folëset vinin nga fusha të ndryshme profesionale, por secila e veçantë dhe e suksesshme në atë që bënte.
Edlira Çepani, një nga femrat që ‘trumpeton’ më shumë nga të gjithë për barazinë gjinore në vend, ishte folësja e parë femër.
Pavarsisht mentalitetit se gruaja fshihet pas shpatullave të burrit, vëllait apo babait, kjo nuk i pengon femrat shqiptare të jenë të suksesshme.
“Është vetë ekonomia e tregut ajo që kërkon që femrat të jenë aktive që ekonomia të ecë në rrugën e duhur,” tha znj. Çepani. Barazisë gjinore nuk i shpëtojmë dot, sepse ajo është e rëndësishme që vendi të ketë zhvillim dhe familja të jetë e shëndetshme.
Sipas Çepanit, një shoqëri që vlerëson vetëm burrat është si një zog me një krah, i cili sa do të përpiqet nuk fluturon dot.
Një grua tjetër e suksesshme në fushën e sportit ishte ajo që na surprizoi me historinë e saj. Klodiana Shala, kampione atletike në Shqipëri dhe Ballkan dhe njëkohësisht këshilltare pranë Këshillit Bashkiak të Tiranës, rrëfeu se përgjatë gjithë karrierës së saj është ndjerë e sulmuar nga burrat. Askush nuk besonte në aftësitë e saj si femër, duke e akuzuar si përdoruese të doppingut. Për këtë arsye, nëse kërkoni dhe në Google, Klodiana është sportistja e dytë në botë për kontrollet më të shpeshta të doppingut. Por kjo nuk e pengoi të bëhej ajo që është sot, dhe të punojë fort për ta ruajtur këtë status.
“Në fillim do të të gjykojnë, më pas do të pyesin si ja dole. Mos u trembni nga asgjë dhe askush,” kjo ishte këshilla e Klodianës për vajzat pjesëmarrëse.
“Thelbi i jetës është të jetosh për veten tënde. Unë kam jetuar për veten time dhe jam krenare,” kështu e mbylli fjalën e saj znj. Shala.
Xhoi Jakaj, e njohur si ish-drejtoreshë e Burgut të Grave aktualisht pedagoge pranë FSHN, ishte gjithashtu një nga folëset e këtij seminari. Në një rrëfim të shkurtër për jetën e saj, Xhoi na solli një tjetër këndvështrim të të qenit femër në shoqërinë tonë. Një femër e guximshme, e përkushtuar te studimet arriti që nga një mësuese bio-kimie të emërohet falë aftësive të saj si drejtoreshë në burgun e Grave në Tiranë.
“Diçka tepër e rëndësishme për femrat është të kenë mbështetjen e njëra-tjetrës, për të mos u ndjerë inferiore në shoqërinë tonë maskiliste,” tha znj. Jakaj. “Realizo ëndërrat brenda vetes, në këtë mënyrë do të frymëzosh dhe femrat e tjera”, vazhdoi më tej ajo.
E rritur në një familje me pesë vëllezër, Xhoi ia doli të krijonte një emër për veten e saj.
Aurora Sulçe, kryeredaktore për ekonominë në Ora News, në një rrëfim të sinqertë për jetën e saj na tregoi të gjitha peripecitë me të cilat ishte përballuar për të realizuar ëndrrën e të qenit një gazetare e suksesshme. E orientuar nga familja për të ndjekur studimet për Psikologji, ndonëse kundër pëlqimit të saj, Aurora përfundon studimet dhe bëhet pjesë e një redaksie lajmesh. E pyetur nga BusinessMag se ku e gjente frymëzimin për të vazhduar përpara, Aurora përmend gazetaren italiane, Oriana Fallaci.
“Sa herë që më caktohej e një detyrë e vështirë unë vrapoja ta bëja, edhe pse isha vetëm 21 vjeç,” tregon znj. Sulçe, “Gjithmonë mendoja me vete; Nëse Orianna arriti t’ja dilte edhe une do t’ia dal”.
Edhe pse “Pushteti është domain burrash”, gazetarja Sulçe e gjen veten çdo ditë përballë tyre në një emision ekonomiko-politike si një moderatore dhe grua e suksesshme.
Antonela Hako, themeluese dhe drejtuese e fabrikës së njohur të sallameve “Hako”, na tregoi se si është të jesh një femër sipërmarrëse. Nën moderimin e Armira Lazaj, ideatore e seminarit, znj. Hako tregoi për vështirësitë me të cilat ajo dhe familja e saj u përballën gjatë kthimit në vend pas emigrimit.
“Shpesh dhe unë jam ndjerë e paragjykuar, sepse nuk po zbatoja modelin tipik shqiptar të të qenit një shtëpiake e cila kujdeset për familjen e saj,”thotë znj. Hako. “Por unë zgjodha të jem përkrah burrit tim për të ndërtuar një sipërmarrje siç është sot “Hako.”
Këshilla e saj për vajzat në sallë ishte “Nëse synon të jesh e suksesshme duhet është të jesh e vendosur dhe të dish se ku do të shkosh.”
Qëllimi i këtij seminari ishte të motivonte pjesëmarrësit, dhe t’i njihte ata me teknikat e lidershipit që mund t’i bëjnë të suksesshëm në tregun e punës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
