Nga këndvështrimi kimik, sheqernat janë thjesht molekula të thjeshta. Por nëse do të pyesnit një nutricionist, përgjigjja do të ishte shumë më komplekse. Sheqeri shkakton një sërë reaksionesh në organizëm: ai shndërrohet në energji për muskujt, ndihmon funksionimin e sinapseve, lidhjeve mes qelizave nervore, dhe luan rol të rëndësishëm në aktivitetin e trurit.
Në tru, ëmbëlsirat favorizojnë prodhimin e substancave që reduktojnë stresin dhe përmirësojnë humorin. Çokollata e zezë, për shembull, është e pasur me serotoninën, ndërsa qumështi përmban triptofan, dy elementë që kontribuojnë në stabilitetin emocional dhe ndjesinë e mirëqenies. Por, pavarësisht këtyre përfitimeve, ka momente të caktuara kur sheqeri duhet shmangur në mënyrë kategorike.
Pas një vakti të bollshëm ushqimi
Nëse keni konsumuar një pjatë me makarona, rizoto apo ushqime të pasura me karbohidrate, të shoqëruara edhe me fruta, nevoja e trupit për sheqer është tashmë e përmbushur. Çdo sasi shtesë edhe një ëmbëlsirë e vogël si një puding, ka shumë gjasa të depozitohet në formën e yndyrës, veçanërisht në zonat më problematike të trupit si barku dhe ijet.
Pas palestrës
Pas stërvitjes, oreksi zakonisht rritet, por zgjedhja e gabuar e ushqimit mund të zhbëjë përpjekjet tuaja. Edhe pse trupi kërkon energji, ajo që muskujt kanë më shumë nevojë janë proteinat, të cilat ndihmojnë në rikuperim dhe në eliminimin e acidit laktik. Një biftek i lehtë, vezë ose djathë pa yndyrë janë zgjedhje shumë më të mira sesa ushqimet me sheqer. Meqenëse pas aktivitetit fizik metabolizmi fillon të ulet gradualisht, konsumimi i sheqerit mund të çojë në grumbullim të panevojshëm kalorish.
Përpara gjumit
Pakoja me biskota para televizorit mund të duket joshëse, por është një nga zakonet më të dëmshme. Sheqeri rrit nivelin e insulinës dhe stimulon trurin, duke prishur cilësinë e gjumit. Për më tepër, gjatë natës metabolizmi është më i ngadaltë, çka do të thotë se sheqeri ka më shumë gjasa të shndërrohet në yndyrë. Nëse ndjeni uri para gjumit, një kos i thjeshtë ose një frut i vogël janë alternativa më të shëndetshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
