Në vend që t’i përjashtojë nga puna me procedura të gjata apo t’i përfshijë në planet klasike të përmirësimit të performancës, Microsoft tani po u ofron punonjësve me performancë të ulët një marrëveshje të thjeshtë, por të drejtpërdrejtë: largohu vetë, dhe merr 16 javë pagë si shpërblim.
Sipas një raporti të brendshëm të siguruar nga Business Insider, gjiganti i teknologjisë i ka dhënë një afat 5-ditor punonjësve të identifikuar si “performues të dobët” për të zgjedhur mes dy opsioneve, ose të pranojnë një marrëveshje ndarjeje me pagesë, ose të futen në një “performance improvement plan” (PIP), që shpesh është pararendës i pushimit nga puna. Dhe nëse zgjedhin këtë të fundit, mundësia për të marrë më vonë një paketë shpërblimi humbet.
Lexo gjithashtu: ChatGPT me kujtesë të përhershme? Ja pyetjet më interesante që mund t’i bëni tani!
Një ndryshim i qasjes në Big Tech
Edhe pse pushimet nga puna në sektorin e teknologjisë shpesh janë “të maskuara” si ristrukturime, Meta hapi rrugën këtë vit me largime të etiketuara si “non-regrettable attrition”, një mënyrë e butë për të thënë, “nuk na vjen keq që ikën.” Amazon gjithashtu ka shtuar ndjeshëm numrin e punonjësve në planet e përmirësimit të performancës. Tani edhe Microsoft po ndjek të njëjtin model, por me një kthesë të re, para se të të largojmë, të ofrojmë që të ikësh vetë, me para në xhep.
Nuk ka kthim pas
Nëse një punonjës pranon marrëveshjen për të dalë nga kompania, Microsoft raporton se i ndalon të ri-aplikojnë për të paktën dy vite. Kjo politikë është pjesë e një strategjie më të ashpër që po ndjekin gjigantët e teknologjisë për të menaxhuar dhe filtruar më rreptësisht stafin.
Në fakt, praktika të ngjashme përdoren tashmë edhe nga Amazon, me programin Pivot, si dhe nga Meta, që sipas raportimeve mban një “listë të zezë” të ish-punonjësve që nuk duhet të rikthehen.
Pse kjo është problematike?
Ekspertët e burimeve njerëzore paralajmërojnë se përdorimi i vlerësimeve të performancës si bazë për pushime nga puna mbart rrezik për paragjykime. Performanca shpesh varet nga menaxheri, nga konteksti i ekipit dhe nga mënyra e menaxhimit, dhe jo gjithmonë reflekton realisht aftësitë apo potencialin e një punonjësi.
Nga ana tjetër, në një kohë kur kultura organizative në shumë kompani teknologjike po përballet me sfida të mëdha (si kthimi i detyruar në zyrë apo rënia e moralit), masa të tilla mund të krijojnë edhe më shumë pasiguri dhe mosbesim në radhët e punonjësve.
Lexo gjithashtu: Kush do të jetë fituesi i garës së robotëve humanoidë?
Një model i ri për “spastrimin” e stafit?
Kjo lëvizje e Microsoft nuk është thjesht një ndryshim në politikën e HR, është një sinjal i qartë se Big Tech po rishikon mënyrën si e menaxhon kapitalin njerëzor në epokën post-bum të teknologjisë.
Në vend që të bëjnë pushime masive të papritura, kompanitë tani po krijojnë rrugë më “të buta”, por që në thelb synojnë të njëjtën gjë: të pastrojnë stafin nga ata që konsiderohen më pak produktivë, me ose pa bujë publike.
A do e shohim këtë model edhe në kompani të tjera? Në një klimë globale me rritje të pasigurisë ekonomike, fleksibiliteti dhe kontrolli mbi koston e stafit është kthyer në përparësi. Pyetja nuk është nëse, por kur do ta shohim këtë qasje të përhapet edhe përtej Big Tech.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
