Kompania Meta njoftoi të mërkurën se po prezanton disa funksione të reja për të zbuluar dhe parandaluar mashtrimet në platformat e saj kryesore: Facebook, WhatsApp dhe Messenger. Qëllimi i këtyre mjeteve është të paralajmërojnë përdoruesit përpara se të ndërveprojnë me përmbajtje ose llogari të dyshimta.
Sipas kompanisë, mashtruesit shpesh përpiqen të shmangin zbulimin dhe jo gjithmonë përdorin menjëherë llogaritë e tyre për veprime të dyshimta. Për këtë arsye, Meta po shton mekanizma që analizojnë sjelljen e llogarive dhe sinjalizojnë përdoruesit kur vërehen elemente që mund të lidhen me mashtrime.
Një nga funksionet që po testohet në Facebook është një sistem paralajmërimi për kërkesat e dyshimta për miqësi. Nëse një përdorues dërgon ose merr një kërkesë nga një llogari që shfaq shenja të aktivitetit të dyshimtë, për shembull ka shumë pak miq të përbashkët ose rezulton se ndodhet në një vend tjetër, platforma do të shfaqë një njoftim paralajmërues. Ky mesazh do t’i sugjerojë përdoruesit të shqyrtojë më me kujdes kërkesën dhe të vendosë nëse duhet ta pranojë apo ta bllokojë atë.
Mbrojtje shtesë në WhatsApp kundër lidhjes së pajisjeve
Në WhatsApp, Meta po prezanton paralajmërime të reja që synojnë të parandalojnë mashtrimet përmes lidhjes së pajisjeve (device linking). Mashtruesit shpesh përdorin metoda të ndryshme për të bindur përdoruesit të lidhin llogarinë e tyre WhatsApp me një pajisje tjetër që kontrollohet prej tyre. Për shembull, ata mund të paraqiten si organizatorë të një konkursi dhe t’u kërkojnë njerëzve të votojnë përmes një faqeje interneti. Në këtë proces, përdoruesit mund të futin numrin e telefonit dhe më pas një kod që shfaqet në WhatsApp, i cili në fakt shërben për të lidhur pajisjen e mashtruesit me llogarinë e tyre. Në raste të tjera, mashtruesit mund të kërkojnë që përdoruesit të skanojnë një QR code me pretendime të rreme, duke i dhënë kështu akses në llogari. Me funksionin e ri, WhatsApp do të analizojë sinjale të caktuara të sjelljes dhe do të paralajmërojë përdoruesit nëse një kërkesë për lidhje pajisjeje duket e dyshimtë. Njoftimi do të tregojë gjithashtu se nga vjen kërkesa dhe do të theksojë se mund të jetë një mashtrim.
Lexo edhe: Europa në rrezen e raketave iraniane,sa real është rreziku për kontinentin?
Zbulim më i avancuar i mashtrimeve në Messenger
Ndërkohë, Messenger do të zgjerojë funksionin e tij të avancuar për zbulimin e mashtrimeve në më shumë vende gjatë këtij muaji. Meta nuk ka bërë të ditur ende se cilat vende do të përfshihen në këtë fazë. Ky sistem analizon bisedat me kontakte të reja dhe identifikon modele që shpesh lidhen me mashtrime, si për shembull oferta të dyshimta pune apo propozime financiare. Nëse zbulohet një model i tillë, Messenger do të paralajmërojë përdoruesin dhe do ta pyesë nëse dëshiron të ndajë disa nga mesazhet e fundit për një analizë me inteligjencë artificiale. Në rast se sistemi identifikon një mashtrim të mundshëm, përdoruesi do të inkurajohet të bllokojë ose të raportojë llogarinë. Platforma gjithashtu do të ofrojë më shumë informacion për format më të zakonshme të mashtrimeve në internet.
Shifra të luftës kundër mashtrimeve
Si pjesë e njoftimit, Meta bëri të ditur se gjatë vitit të kaluar ka hequr më shumë se 159 milion reklama mashtruese, ku rreth 92% e tyre u bllokuan përpara se të raportoheshin nga përdoruesit. Gjithashtu, kompania ka fshirë 10.9 milion llogari në Facebook dhe Instagram që ishin të lidhura me qendra kriminale mashtrimesh. Këto masa tregojnë përpjekjet e vazhdueshme të kompanisë për të forcuar sigurinë e përdoruesve dhe për të kufizuar aktivitetet mashtruese në platformat e saj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
