Mbyllja e qeverisë amerikane, ari arrin rekord, tregjet botërore me luhatje

Tregjet globale reaguan me luhatje pas nisjes së një mbylljeje të pjesshme të qeverisë amerikane, ndërsa çmimi i arit shënoi një rekord të ri.

Të mërkurën, pas dështimit të ligjvënësve për të rënë dakord mbi buxhetin federal, Shtetet e Bashkuara hynë në një bllokim të pjesshëm qeveritar, duke rritur frikën për pasoja ekonomike nëse kriza zgjat.

Futures amerikane ranë, dollari u dobësua, ndërsa bursat evropiane fillimisht nisën negativisht, por ndryshuan kah nga mesdita. Indeksi FTSE 100 në Londër u rrit me 0.7% falë aksioneve farmaceutike, ndërkohë që DAX në Frankfurt dhe CAC 40 në Paris shënuan fitime pas humbjeve fillestare. IBEX 35 në Madrid mbeti lehtësisht në rënie. Në SHBA, S&P 500 ra me 0.5%, Dow Jones me 0.5% dhe Nasdaq me 0.6%.

Inflacioni në eurozonë
Një faktor tjetër ishte publikimi i të dhënave për inflacionin në eurozonë, i cili u rrit në 2.2% në shtator, mbi objektivin 2% të Bankës Qendrore Evropiane. Inflacioni bazë mbeti në 2.3%. Analistët vlerësuan se tendenca mbështet pritjet për ulje të ardhshme të normave të interesit nga ECB.

Lexo edhe: Nga Napoli në Tiranë, si Diego Pisa ndërtoi një perandori punësimi me 3500 njerëz dhe e ktheu Teleperformance në model europian

Ndikimi i mbylljes amerikane
Megjithëse mbyllja pritej të ngadalësonte aktivitetin tregtar, investitorët nuk kanë bërë shitje masive, duke marrë parasysh përvojat e mëparshme kur bllokimet e qeverisë në SHBA kanë pasur ndikim të kufizuar. Por nëse ngërçi vazhdon, pritet të vonojë publikimin e raportit mujor të tregut të punës – një tregues kyç për investitorët dhe për vendimet e Rezervës Federale mbi normat e interesit.

Ari, nafta dhe valutimet
Ari arriti nivelin rekord prej 3,918.80 dollarësh për ons para mesditës në Evropë. Çmimet e naftës ranë: WTI ulet me gati 1% në 61.75 dollarë për fuçi, ndërsa Brent humbi 0.9%, duke zbritur në 65.44 dollarë. Dollari amerikan ra ndaj jenit japonez, ndërsa euro dhe paundi britanik shënuan rritje të lehta.

Tregjet aziatike
Në Japoni, Nikkei 225 ra me 0.9% pas publikimit të një ankete mbi sentimentin e bizneseve. Raporti nxit pritjet se Banka e Japonisë mund të rrisë normën bazë të interesit për të frenuar inflacionin. Në Azi, tregjet lëvizën të përziera: Kospi i Koresë së Jugut u rrit me 0.9%, Taiex i Tajvanit me 0.6%, ndërsa S&P/ASX 200 i Australisë shënoi një rënie minimale. Në Indi, Sensex fitoi 0.6%. Në Kinë, bursat janë të mbyllura për festën kombëtare.