Për ekspertët, aksidenti tragjik i një makine të prodhuar nga kompania Tesla, shoferi i së cilës mbeti i vrarë në muajin maj, ndërsa ishte duke përdorur funksionin e autopilotit, tregon se industria e automobileve po nxiton pak si shumë me hedhjen e makinave të tilla në treg.
Mary Cummings, profesoreshë në “Duke University”, shprehet: “Ajo që dimë është se frenat e makinës nuk u përdorën kurrë. Kështu që mjeti e goditi kamionin me shpejtësi të plotë, çka dëshmon se shoferi ishte krejtësisht i pavetëdijshëm për rrezikun”.
Debati mbi çështjen u rindez pasi firma pohoi se aksidenti ka ndodhur në kohën kur po përdorej piloti automatik, çka nxiti një hetim federal mbi sigurinë e këtyre makinave në Shtetet e Bashkuara. Sipas policisë rrugore atje, kamioni goditi makinën ndërsa kjo po kalonte në një autostradë në Florida më 7 maj. Për rrjedhojë, makina e shtyrë nga goditja u përplas me një shtyllë elektriku.
Administrata Kombëtare e Sigurisë së Trafikut njoftoi se po kryen një vlerësim paraprak rreth sistemit autopilot në 25 mijë makina Tesla të Modelit S. Sipas firmës, ky është i pari aksident fatal i verifikuar në kohën që përdorej funksioni autopilot. Ideja e një automjeti me autopilot ka ekzistuar që nga viti 1930, por u deshën 80 vjet që ajo të bëhet më popullore dhe praktike.
Megjithatë, industrisë i mbeten shumë probleme për të zgjidhur para se këto makina mund të ofrohen në treg për përdorim të gjerë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
