Ministrja Ekonomi u shpreh se Organizata Botërore e Turizmit prej kohësh e quan turizmin e gastrononomisë, një nga trendet e reja që janë shfaqur në sektorin e turizmit. Trendi për të bërë gastronominë turizëm botëror ka nisur në 2004.
“Ne i jemi bashkuar këtij trendi, pak më vonë, por jemi në kohë. Arsyeja pse Organizata Botërore e Turizmit vendosi që gastronomia mund të jetë një produkt i mirë turistik për t’u zhvilluar, lidhej me një fakt të rëndësishëm që ka të bëj me jetën e komuniteteve të vogla lokale që duhet të bëhen pjesë e gjithë zhvillimit të vendit”, theksoi ajo.
Por sipas saj, nëse duam të zhvillojmë kulinarinë, duhet të përpiqemi fort që ta kthejmë atë në një instrument zhvillimi duke ndihmuar një bashkësi lokale që të nxjerrë më të mirën e vet dhe të japë më shumë produkte karakteristike të zonës së saj.
Tashmë zona rurale është një zonë që lidhet më lehtë me zonën urbane dhe kjo vjen falë urbanizimit më të madh të territoreve. Edhe Shqipëria, shtoi ministrja Ekonomi, po urbanizohet më shumë duke e bërë më të prekshme një zonë nga pikpamja e produkteve të artizanatit dhe kulinarisë.
Turizmi i kulinarisë, tha ministrja Ekonomi, i jep mundësinë sipërmarrësve që përveçse të jetë prodhues i produktit, të bëhet dhe shijues i produkteve të ngjashme. Ky, sipas saj, është një dimension i ri që Organizata Botërore e Turizmit i ka dhënë turizmit të kulinarisë.
“Ndërkohë në Shqipëri fryma e bashkëpunimit me kultura të reja ndërkombëtare është shtuar, pasi shumë nga ju kanë marrë eksperiencë falë lëvizjeve demografike që kanë ndodhur. Shqipëria jo vetëm ka nevojë t’i përqafojë këto modele, por t’i bëjë pjesë të politikave të aftësimit profesional”, tha Ekonomi.
Sot shkollat profesionale në hoteleri turizëm, kuzhinë, kafe bar restorante janë në vëmendje të të gjithë politikave të aftësimit profesional. Ndaj dhe Ekonomi vlerësoi nismën për hapjen e shkollave të vogla apo kurseve të kulinarisë të hapura nga anëtarë të shoqatës, të cilat e bëjnë më të shtrirë kulturën e gastronomisë në Shqipëri.
Konferenca u pasua nga një prezantim kulunarie ku u prezantuan gatimet më të mira shqiptare që nga zona e Kelmendit e deri në Gjirokastër. Nën moton “Turizmi fillon nga ne”, kjo shoqatë synon që të njihet vlera e kulinarisë shqiptare dhe të promovohet sa më shumë.
Drejtuesi i kësaj shoqate Kujtim Dervishi tha se synon që anëtarësia e kësaj shoqate të zgjerohet. Tashmë kjo shoqatë do krijojë dhe një aplikacion ku të listohen të gjithë restorantet e mira shqiptare. Në panair merrnin pjesë rreth 50 biznese, mes të cilëve prodhues vaji, vere, të baxhove të djathit, kompani birre dhe përfaqësues të restoranteve tipike shqiptare.
Burimi: ata.gov.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
