Grupi Kastrati, ka nënshkruar sot në ambientet e aeroportit “Nënë Tereza”, në Tiranë, një marrëveshje të rëndësishme me konglomeratin francez Lagardere, për zhvillimin e përpjekjeve të përbashkëta për zgjerimin e mëtejshëm të aktivitetit të dyqaneve duty-free dhe shitjes me pakicë në të gjithë Shqipërinë.
Marrëveshja u nënshkrua nga presidenti i grupit Kastrati, Z. Shefqet Kastrati dhe Znj. Catherine Guyomard, Kryetare e Komitetit Ekzekutiv të Lagardère Travel Retail (divizioni i shitjes me pakicë të Lagardère).
Gjatë ceremonisë ishin të pranishëmPresidenti i Republikës Franceze, H.E. z. Emmanuel Macron dhe kryeministri i Shqipërisë, z. Edi Rama.
Ky bashkëpunim vjen në kuadër të rritjes së jashtëzakonshme të numrit të turistëve që vizitojnë Shqipërinë. Vetëm sezoni veror ka qenë befasues, i cili ka sjellë dyfishim të të ardhurave nga turizmi në ekonomi, si dhe rritje të numrit të turistëve që kanë vizituar Shqipërinë, krahasuar me një vit më parë. Marrëveshja e nënshkruar mes grupit Kastrati dhe Lagardère Travel Retail konsiston në zgjerimin e aktivitetit të shitjes me pakicë dhe shtrirjen e shërbimit pa doganë në të gjitha pikat kufitare dhe qendrat kryesore turistike në Shqipëri. Këto dy grupe janë të përkushtuar që krahas zgjerimit të rrisin ndjeshëm cilësinë e shërbimit si dhe shumëllojshmërinë e produkteve.
Grupi Kastrati u themelua në vitin 1991 dhe sot zhvillon aktivitetin e tij në të gjithë rajonin e Ballkanit duke punësuar mbi 4000 punonjës. Grupi Kastrati, i njohur kryesisht për tregtimin me shumicë dhe pakicë të hidrokarbureve, zhvillon një aktivitet të rëndësishëm në fusha si: sigurime, ndërtim, infrastrukturë, turizëm, industri automjetesh etj.
Lagardère është një grup ndërkombëtar me bazë në Francë që operon në fushën e shitjes me pakicë, botimeve, mediave dhe shpërndarjeve. Divizioni i tyre i shitjes me pakicë të udhëtimeve është në 42 vende dhe operon dyqane pa doganë në më shumë se 200 aeroporte në Francë, Mbretërinë e Bashkuar, Spanjë, Itali, Hollandë, Amerikën e Veriut, etj. Gama e aktiviteteve të grupit përfshin gjithashtu praninë në media të rëndësishme franceze si p.sh. si Paris Match, Le Journal du Dimanche, Europe 1, Europe 2, RFM etj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
