Alphabet, Amazon dhe Meta pritet të zotërojnë një pjesë të kombinuar prej 54.7% të tregut të reklamave në nivel global (jashtë Kinës) gjatë vitit 2025, ose 524.4 miliardë dollarë në vlerë monetare. Sipas raportit të përditësuar të WARC – Global Ad Forecast Q2 2025, kjo shifër pritet të rritet në 56.2% deri në vitin 2026, duke thelluar më tej dominimin e tyre në peizazhin global të reklamave.
Treguesit kryesorë nga raporti
Ky përditësim i fundit bazohet në të dhëna të grumbulluara nga 100 tregje botërore dhe përdor një rrjet nervor të brendshëm, i cili analizon mbi dy milionë pika të dhënash për të parashikuar tendencat e investimeve në reklamë.
Kërkimi: Shtylla kryesore e rritjes
Reklamat në motorët e kërkimit do të përbëjnë 21.5% të tregut të reklamave këtë vit, me një rritje vjetore prej 7.4%, duke arritur 248.6 miliardë dollarë. Parashikimet sugjerojnë një rritje të mëtejshme prej 6.8% në vitin 2026, kur tregu do të arrijë 265.5 miliardë dollarë, duke e ruajtur të njëjtin përqindje të peshës në totalin global.
Rrjetet sociale: Mediumi më i madh global i reklamave
Rrjetet sociale vazhdojnë të jenë mediumi më i fuqishëm, duke përthithur 25.8% të shpenzimeve botërore për reklamë në vitin 2025, që përkthehet në 298.3 miliardë dollarë. Edhe pse tremujori i parë ka shënuar një rritje të fortë prej 14.9%, rritja e përgjithshme për pjesën tjetër të vitit pritet të ngadalësohet në mesatarisht 11.2%, për shkak të ndikimit të tarifave ndaj markave aziatike.
Retail Media: Rritja më e shpejtë
Reklamat në retail media janë mediumi me rritjen më të lartë këtë vit, me një normë prej 14.4%, duke përbërë tashmë 15.2% të tregut global të reklamave. Amazon, lider i këtij segmenti, raportoi 21.0% rritje në të ardhurat nga reklamat e retail-it në tremujorin e parë, duke gjeneruar 13.3 miliardë dollarë – që përbën 33.4% të këtij tregu global. Sipas WARC, të ardhurat vjetore të Amazon nga reklamat pritet të arrijnë 60.6 miliardë dollarë këtë vit, me një rritje tjetër prej 14.9% të parashikuar për vitin e ardhshëm.
Reklamat video: Rënie për herë të parë
Në kontrast me trendin në rritje të kanaleve të tjera, shpenzimet për reklamat video pritet të bien me 2.6% në vitin 2025, duke zbritur në 183.9 miliardë dollarë, ose 15.9% të totalit global të reklamave. Kjo rënie vjen kryesisht nga tkurrja e reklamave në televizionin linear, që ende përbën mbi tre të katërtat e tregut të videove, por që parashikohet të bjerë me 6.3% këtë vit. Në kontrast, reklamat në platformat video-on-demand (VoD) pritet të rriten me 13.2%, duke arritur 39.9 miliardë dollarë.
Viti 2025 shënon një moment historik: për herë të parë retail media do të tejkalojë televizionin linear në pjesën që zë në shpenzimet globale për reklamë, një tregues i qartë i zhvendosjes së markave drejt platformave më të targetuara, më të matshme dhe më të ndikuara nga teknologjia.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
