Impiantet e mëdha fotovoltaike/ Katër aplikime të reja pranë Ministrisë së Energjisë

Katër aplikime të reja kanë mbërritur së fundmi pranë Ministrisë së Infrastrukturës dhe Energjisë lidhur me impiante fotovoltaikë. Tre prej tyre janë me kapacitet të instaluar deri në 2MW ndërkohë që një aplikim tjetër rezulton për një impiant me kapacitet 8 MW që nuk përfiton nga masat mbështetëse të qeverisë.

Konkretisht projekti i parë është një aplikim i shoqërisë Parisol sh.p.k . ka shprehur interesin dhe ka paraqitur pranë Ministrisë së Infrastrukturës dhe Energjisë, aplikimin për ndërtimin e një impianti fotovoltaik për prodhimin e energjisë elektrike nga burime të rinovueshme, me kapacitet 2 MW, në Fshatin Grykë, Njësia Administrative Topojë, Bashkia Fier, Qarku Fier.

E dyta është shoqëria “G.S.K” SH.P.K. për një impiant 2MË në Zonën Kadastrale 3038, Bashkia Fier, Qarku Fier.

E treta është bashkimi i “H&E ENERGY” SH.P.K dhe “ALBSOLAR” SH.P.K që kanë shprehur interesin  për ndërtimin e një impianti fotovoltaik për prodhimin e energjisë elektrike nga burime të rinovueshme, me kapacitet 2 MW, në Zonën e Bisht Kamzës, Njësia Administrative Katund i Ri, Bashkia Durrës, Qarku Durrës.

Lexo edhe: Energjia solare, disa herë më e lirë se ajo hidrike

E njëjta shoqëri rezulton të ketë bërë dhe aplikimin e katërt  duke shprehur interesin edhe për një impiant fotovoltaik  me kapacitet 8 MW, i cili nuk përfiton nga masat mbështetëse, në Zonën e Bisht Kamzës, Njësia Administrative Katund i Ri, Bashkia Durrës, Qarku Durrës.

Aplikimet pranë Ministrisë së Infrastrukturës dhe Energjisë për impiante fotovoltaikë ka qenë në rritje nga viti në vit ndërkohë që interes ka pasur edhe për impiante eolike edhe pse kjo në një nivel më modest sesa e para.

Kriza e fundit e energjisë që ka vënë theksin tek diversifikimi duket se po nxit gjithmonë e më shumë bizneset të investojnë drejt burimeve të rinovueshme alternative përveç “hidros”.