Ka shumë mënyra për të shijuar Ibizën. Por nëse doni të provoni gjithçka, nga superklubet, tek plazhet e qeta dhe kampingjet e çmendura, mënyra më e mirë është të merrni me qira një automjet dhe të eksploroni ishullin me ritmin tuaj.
Qiraja e makinave dhe automjeve për kamping është një mënyrë jashtëzakonisht popullore për të vizituar Ibizën, por ky popullaritet ka sjellë pasoja. Gjatë muajve të nxehtë të verës, ishulli përballet me trafik të rënduar dhe bllokime, duke e bërë të vështirë për banorët të lëvizin. Prandaj, qeveria ka vendosur të ndërhyjë. Nga data 1 qershor deri në fund të shtatorit, numri ditor i automjeteve të përdorura nga jo-rezidentët do të kufizohet në 20,168. Rreth 16,000 leje do të rezervohen për makina me qira, ndërsa rreth 4,000 leje të tjera do t’u ndahen vizitorëve, që sjellin automjetin e tyre në ishull me traget.
Lexo edhe:Kur realja humbet kuptimin: Kush jemi ne në epokën e selfie-ve?
Sipas The Independent, ata që dëshirojnë të përdorin makinën e tyre në ishull, do të duhet të aplikojnë paraprakisht për një leje, e cila do të kushtojë 1 euro në ditë. Kufizimet përfshijnë edhe makinat për kamping. Edhe pse kampingu në natyrë është tashmë i ndaluar në Ibiza, ata që dëshirojnë të sjellin ose të marrin me qira automjet të tillë, do të duhet të tregojnë dëshmi të rezervimit në një kamp të autorizuar. Siç pritej, kjo është një nga disa masat e reja për të luftuar ndikimin e mbiturizmit. Sipas Euronews, numri i makinave në rrugët e Ibizës është katërfishuar në 20 vitet e fundit. Ishulli, që ka rreth 160,000 banorë të përhershëm, pret çdo vit rreth 3 milionë turistë, domethënë 18.75 turistë për çdo banor. Kjo nuk është hera e parë që Ibiza vendos kufizime për turistët. Verën e kaluar, ishulli i festave ndaloi shitjen e alkoolit dhe konsumimin e tij në publik.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
