Drejtoria e Hetimit Tatimor, në bashkëpunim me Prokuroritë e Rretheve Gjyqësore, në tre muajt e fundit të vitit të kaluar (tetor–dhjetor 2017), ka referuar pranë këtyre organeve 54 subjekte tregtare, për disa vepra penale. Këto vepra penale kanë për autorë 72 persona që po hetohen në gjendje të lirë. Sipas Drejtorisë së Përgjithshme të Tatimeve, dëmi financiar i shkaktuar si pasojë e këtyre veprave penale përllogaritet mbi 4 miliardë lekë.
Masat kanë ardhur gjatë kontrolleve që Drejtoria e Përgjithshme e Tatimeve dhe strukturat në varësi të saj, bënë në kuadër të luftës kundër informalitetit. Krahas kontrolleve të aktiviteteve ekonomike në të gjithë territorin tatimet theksojnë se u fokusuan në parandalimin, zbulimin, dhe goditjen e veprave penale në fushën e tatim-taksave. Materialet e referuara në prokurori lidhen me vepra penale përfshijnë:
–Krijimin e skemeve të mashtrimit me TVSH-në. Janë referuar 4 raste me 21 autorë, me një vlerë dëmi prej 3 milionë lekë.
–Fshehje të ardhurash, janë referuar gjithsej 13 raste me 14 autorë, me një vlerë fshehjeje prej gati 8 milionë lekë.
–Mospagim taksash dhe tatimesh, janë referuar gjithsej 21 raste me një vlerë mospagimi prej gati 3 miliardë lekë.
Sipas tatimeve, janë referuar edhe 16 raste për shkelje të tjera të parashikuara në Kodin Penal me 16 autorë me një vlerë dëmi prej 800 mijë lekë.
‘Për të gjithë rastet e sipërcituara është arritur të bëhet dokumentimi i plotë ligjor i veprimtarisë së paligjshme të këtyre subjekteve. Në bashkëpunim me Prokuroritë përkatëse vijon puna për përfundimin sa më të shpejtë të hetimit dhe dërgimin e autorëve për gjykim nga organet e drejtësisë’, theksojnë tatimet.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
