Google planifikon të investojë deri në 1.8 miliardë € në një qendër të të dhënave në Poloni për shërbimet “cloud”, vendim që vërteton atë që paralajmëroi Microsoft më herët gjatë vitit. Lajmi është bërë i ditur nga gazeta ekonomike polake “Puls Biznesu”.
I ashtuquajturi “rajoni Google Cloud” në Varshavë është investimi më i madh në infrastrukturën “cloud” në Poloni”, i tha Puls Biznesu Magdalena Dziewguc, drejtoresha e ”Google Cloud” në Poloni dhe Europën Qendrore dhe Lindore. Dziewguc nuk ka dhënë një shifër të saktë për investimin, por tha se investimi financiar i Google për projektin pritet të jetë midis 1.5 dhe dy miliardë dollarë (1.3-1.8 miliardë euro ) dhe se pritet që qendra e të dhënave të fillojë të veprojë në fillim të vitit të ardhshëm. Polonia, vendi me ekonominë më të madhe në Europën Lindore, tërheq vëmendjen pasi shihet si një qendër rajonale teknologjike.
Gjithashtu edhe ”Microsoft” me seli në SHBA, në muajin maj kishte njoftuar se do të investonte një miliard dollarë në qendrën e të dhënave në Poloni.
