Gjirofarma, historia e një biznesi në mision për dërgimin e “shijes së shtëpisë” deri larg!

Gjirofarma, është ndër bizneset që u pozicionua mirë në treg me brandin e saj që në fillimet e aktivitetit. Ajo është ndër rrjetet e para të bulmetit vendas, duke mbërritur te klienti me produkte si:  djathi, kosi, salca e gjiza. Sot, qindra bujq dhe fermerë kanë pranë tyre një kompani që garanton blerjen e lëndës së parë. 

Gjirofarma ka investuar që në fillim në aplikimin e teknologjive të reja për përpunimin e qumështit. Marka e saj ka kaluar edhe kufijtë duke mbërritur deri në Amerikë. Drejtuesit e kompanisë thonë se ky nuk është vetëm eksport, por edhe mision për dërgimin e “shijes së shtëpisë” deri larg. 

Ne kemi zhvilluar një intervistë me drejtorin ekzekutiv të kompanisë Marko Konomi, për të mësuar më shumë se si kompania ia ka dalë të dallojë në një sektor kaq konkurrues.

Cila është historia pas Gjirofarma? Si u mor vendimi për t’u futur në industrinë e përpunimit të qumështit?  

Ideja për krijimin e një shoqërie për përpunimin e qumështit në zonën e Gjirokastrës, e cila është një zonë e famshme prej dekadash për produktet cilësore të bulmetit, e ka zanafillën në mes të viteve ’90. Arsyeja lidhet pikërisht me zonën dhe me veçantitë e saj për sa i përket qumështit dhe nënprodukteve të tij, si dhe nevojës së dukshme në atë kohë për një njësi moderne të përpunimit të qumështit, e cila do të bënte të mundur shkëputjen nga tradita e njësive shumë të vogla të përpunimit, të cilat vazhdonin të përdornin metoda të vjetëruara dhe që bazoheshin në teknologji të vjetëruar. Nga ana tjetër, ishte e dukshme se kishte ardhur koha për një qasje të re ndaj fermerëve, duke i shtyrë dhe ndihmuar ata që të shkëputeshin përfundimisht nga e kaluara e kooperativave bujqësore të tipit komunist dhe ideve të prapambetura që kjo e kaluar mbarte me vete. 

Artikulli u publikua në faqen 64 të numrit 31 të revistës Business Magazine Albania.  Ju mund Abonoheni dhe të Shfletoni Këtu nr. 31 të saj.