Pas ministres gjermane të Mbrojtjes, Christine Lambrecht, sinjali vjen akoma edhe më i fortë e i qartë nga kancelari Olaf Scholz: Gjermania është gati të marrë më shumë përgjegjësi ushtarake në Europë.
Pretendimet për një rol drejtues të saj në kontinentin europian nga ana ushtarake me qëllim garantimin e sigurisë, po artikulohen hapur. Duke e cilësuar Rusinë si “kërcënimin më të madh” të NATO-s, Scholz u shpreh se Europa duhet të jetë e përgatitur për përballje.
Lexo edhe: Qeveria gjermane miraton lehtësi për të papunë dhe të pasur
“Ne po e bëjmë shumë të qartë: Gjermania është e gatshme të marrë përgjegjësi për sigurinë e kontinentit tonë. Si shteti më i populluar, me ekonominë më të madhe, dhe si shtet që gjendet në mes të kontinentit, ushtria jonë duhet të jetë gurëthemel i mbrojtjes tonë konvencionale në Europë, duhet të jetë forca më e pajisur në Europë.” – Olaf Scholz.
E përfshirë në dy luftëra botërore, Gjermania shpesh ka qenë e heshtur në skenën botërore, kur është diskutuar për ushtri dhe çështje tjera të kësaj natyre. Por, gjërat po ndryshojnë. Scholz u shpreh se ushtria gjermane për shumë kohë është angazhuar në “sigurimin e ndihmës humanitare, në ofrim të ndihmës pas vërshimeve dhe në përpjekjet për vaksinim kundër pandemisë”. Por, ky nuk është misioni kryesor, theksoi ai: Qëllimi ynë i parë është mbrojtja e lirisë në Europë”. Lufta e nisur në Ukrainë nga ana e Rusisë, e ka nxitur Qeverinë gjermane të heqë dorë nga disa politika për mbrojtje dhe çështje të jashtme. Duke e pranuar se kapaciteti i ushtrisë ka boshllëqe, kancelari u zotua t’i përmbushë shpejt ato.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
