Ka disa rregulla të arta që duhen ndjekur kur kërkoni një punë të re: të kontrolloni CV-në tuaj për gabime të mundshme drejshkrimore, t’i drejtoheni kompanisë së duhur në letrën tuaj të motivimit, si dhe të jeni në orar për të gjitha intervistat.
Megjithatë, disa gabime janë më pak të dukshme dhe më të vështira për t’u shmangur, por gabime të tilla mund të përbëjnë diferencën midis ofrimit të vendit të punës dhe refuzimit të tij.
Lauren Gardner, drejtuesja e burimeve njerëzore në Microsoft, i kupton shumë mirë këto gabime. Ajo ka vlerësuar mijëra kandidatë për pozicione të ndryshme pune në 31 vitet e saj të eksperiencës pranë gjigantit të teknologjisë. Gardner thotë për CNBC Make It se punëkërkuesit priren të bëjnë një gabim të madh gjatë kërkimit të tyre për punë.
Sipas Gardner, gjëja më e keqe që një kandidat mund të bëjë është që të përdorë “aplikimet e përgjithshme”. “Njerëzit zakonisht dërgojnë mijëra CV dhe shpresojnë që njëra prej tyre të jetë e suksesshme,” shpjegon ajo. “Unë nuk do të rekomandoja që të bëni vetëm një ose dy aplikime, por kur bëni shumë të tilla, njerëzit do të fillojnë të dyshojnë se për çfarë jeni në të vërtetë të apasionuar.”
Në vend të kësaj, Gardner rekomandon që të ngushtoni rrethin e kërkimit tuaj për një vend pune, duke filluar me një listë me 10-15 kompani për të cilat jeni të interesuar, dhe më pas të zgjeroni kërkimin tuaj nëse nuk po merrni rezultatet që prisnit. “Duhet të siguroheni që të shfaqni një interes të sinqertë në disa kompani,” shton ajo.
Është gjithashtu e rëndësishme që të jeni sa më të përmbledhur dhe ta përshtasni CV-në tuaj në një faqe. “Njerëzit shpesh dërgojnë CV tepër të gjata, por askush nuk ka kohë për të shqyrtuar gjithë atë informacion,” thotë Gardner.
Lexo: Si t’u mbijetoni shkurtimeve të vendeve të punës në kompaninë tuaj
CV-ja juaj duhet parë në këtë këndvështrim: Nëse do të kishit vëmendjen e dikujt për 30 sekonda, çfarë do të dëshironit që ai të dinte për ju?
“Kam parë disa CV fantastike ku njerëzit jo vetëm tregojnë aftësitë dhe përvojat e tyre, por përfshijnë një seksion të shkurtër me ‘interesat’ e tyre, duke theksuar hobit dhe pasionet që kanë, dhe leximi i të gjithë CV-së nuk merr më shumë se një minutë kohë,” thotë Gardner. “Kjo është e gjihë koha që njerëzit kanë në dispozicion për të shqyrtuar aplikimin tuaj – prandaj, ju duhet të shkruani gjërat që janë më unike për ju, në mënyrë sa më konҫize.”
Gardner rekomandon një qasje të ngjashme duke ngushtuar rrethin e kërkimit edhe për aspekte të tjera të këtij procesi. “Nuk është nevoja që të shkruani qindra letra motivimi – pasi do të çmendni veten tuaj”, thotë ajo.
Është mirë të keni një strukturë bazë të letrës së motivimit për aplikimet për punë dhe të përshtasni detajet për secilën kompani apo pozicion që po aplikoni. “Ne e dimë që tregu është dinamik dhe njerëzit po aplikojnë në shumë kompani të ndryshme,” thotë Gardner. “Por, pse po aplikoni në kompaninë tonë dhe cila është gjëja më interesante sipas jush në lidhje me punën këtu?”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
