Presidenti francez Emmanuel Macron ka deklaruar se dëshiron që qeveria e tij të përshpejtojë procedurat ligjore, në mënyrë që ndalimi i përdorimit të rrjeteve sociale për fëmijët nën moshën 15 vjeç të hyjë në fuqi përpara fillimit të vitit të ri shkollor në shtator.
“Truri i fëmijëve dhe adoleshentëve tanë nuk është për shitje,” u shpreh Macron në një video të publikuar të shtunën vonë nga BFMTV, partner i CNN në Francë. “Emocionet e tyre nuk janë për t’u shitur apo manipuluar, qoftë nga platformat amerikane apo nga algoritmet kineze.”
“Po ndalojmë rrjetet sociale për nën 15-vjeçarët dhe do të ndalojmë edhe telefonat celularë në gjimnaze. Kjo është një rregull i qartë, i qartë për adoleshentët, për familjet dhe për mësuesit,” theksoi ai. Deklarata e Macron vjen në një kohë kur gjithnjë e më shumë vende perëndimore po ndërmarrin masa ligjore të forta për mbrojtjen e të miturve nga dëmet e mundshme të rrjeteve sociale. Kjo ndodh pas ligjit historik të miratuar në dhjetor nga Australia, i cili ndalon përdorimin e platformave si Instagram, TikTok dhe Facebook për të rinjtë nën moshën 16 vjeç.
Edhe qeveria britanike ka bërë të ditur së fundmi se po shqyrton një sërë masash për sigurinë e fëmijëve në internet, përfshirë mundësinë e ndalimit të rrjeteve sociale për nën 16-vjeçarët.
Në Francë, nisma po udhëhiqet nga deputetja Laure Miller nga partia “Renaissance” e Macron. Në një intervistë për televizionin e Parlamentit francez, ajo theksoi se ndërhyrja është e domosdoshme, pasi aktualisht nuk ekziston asnjë verifikim real i moshës. “Çdokush mund të vendosë një datëlindje të rreme dhe të hyjë në platformë. Ajo që duam të imponojmë, duke zbatuar rreptësisht Aktin Evropian për Shërbimet Digjitale (DSA), është verifikimi real i moshës kur përdoruesit aksesojnë rrjetet sociale. Kjo ndryshon gjithçka,” u shpreh ajo.
Lexo edhe: Pas Australisë, edhe Malajzia do të ndalojë rrjetet sociale për personat nën 16 vjeç
Edhe pse pranoi se gjithmonë do të ketë mënyra për të anashkaluar kufizimet, Miller theksoi se Franca duhet “të vendosë një vijë të qartë për mbrojtjen e të miturve online”.
Pas hyrjes në fuqi të ligjit australian, më shumë se 4.7 milionë llogari rrjetesh sociale, të dyshuara se i përkisnin të rinjve nën 16 vjeç, janë çaktivizuar ose fshirë, sipas kryeministrit Anthony Albanese.
Në një intervistë për CNN, Albanese deklaroi se qeveria e tij reagoi sepse “dëmi social është real dhe ne kemi përgjegjësinë t’u përgjigjemi shqetësimeve të prindërve, por edhe vetë të rinjve që thonë: na lini të jemi thjesht fëmijë.” Në prag të ndalimit, kryeministri iu drejtua adoleshentëve australianë me një video-mesazh, duke i inkurajuar të “fillojnë një sport të ri, të mësojnë një instrument muzikor ose të lexojnë librin që kanë lënë prej kohësh në raft”.
Ndërkohë, pronari i platformës X, Elon Musk, shprehu kundërshtimin e tij ndaj ligjit, duke e quajtur atë “një luftë të fshehtë për të kontrolluar aksesin në internet”. Megjithatë, platforma ka zbatuar masat e vendosura. Një nga shtysat kryesore për ligjin australian ishte libri The Anxious Generation i psikologut amerikan Jonathan Haidt, botuar në vitin 2024. Libri argumenton se rrjetet sociale kanë dëmtuar rëndë shëndetin mendor të fëmijëve.
Sipas Haidt, “ne i kemi mbrojtur tepër fëmijët në botën reale dhe i kemi lënë të pambrojtur në botën online”. Si zgjidhje, libri propozon ndalimin e telefonave inteligjentë në shkolla dhe ndalimin e rrjeteve sociale për të miturit – masa që tashmë po përkthehen në politika konkrete në disa vende.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
