Për dymujorin e parë të vitit 2017, eksportet prekën vlerën e 39 miliardë lekëve, 15% më shumë krahasuar me të njëjtën periudhë të një viti më parë.
Eksportet po ndjekin tendencën pozitive të tremujorit të fundit të vitit 2016, të udhëhequra gjithnjë nga sektori fason, por edhe të ndihmuara nga shenja përmirësimi në grupin e mineraleve. Sipas INSTAT, eksportet e grupit “tekstile dhe këpucë” për dy muajt e parë të këtij viti u rritën me afërsisht 5% me bazë vjetore dhe dominuan në strukturën e eksporteve, me afro 46% të totalit.
Grupi “minerale, lëndë djegëse, energji” edhe për këtë fillim viti po vazhdon rritjen, në gjurmët e rimëkëmbjes së nisur në fundin e vitit të kaluar. Eksportet e këtij grupi për dy muajt e parë të vitit arritën në 7.6 miliardë, në rritje me 72% krahasuar me një vit më parë. Në rritje për muajin e parë të këtij viti rezultuan edhe eksportet e grupit “materiale ndërtimi dhe metale”.
Edhe importet u rritën gjatë Shkurtit, pas një fillimi të vakët të vitit në muajin Janar. Për muajin Shkurt, importet u rritën me 4.8%, ndërsa për dymujorin e parë vlera totale arriti në 79 miliardë lekë, 3% më shumë krahasuar me të njëjtën periudhë të një viti më parë.
Rritja e kënaqshme e eksporteve për momentin e mban deficitin tregtar në vlera lehtësisht më të ulëta krahasuar me një vit më parë. Për dymujorin deficiti ishte rreth 40 miliardë lekë, 3 miliardë lekë më pak krahasuar me të njëjtën periudhë të vitit 2016.
Burimi: scan-tv.com
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
