Shkroi: Silvana Xheka
Kryeministri i vendit, Edi Rama, përdor paralelisht disa kanale të ndryshme komunikimi digjital. Secili kanal arrin segmente të ndryshme të audiencës lokale dhe ndërkombëtare dhe ka gjithashtu ndërveprim specifik me ta.
Në vijim të tragjedisë apo krimit kombëtar, humbjes së jetës të një fëmije brigjeve të pasigurta shqiptare, kryeministri komunikoi në kanalin parësor facebook vetëm lajme të ëmbla suksesi, në disa komunikime radhazi.
Kjo strategji reduktoi pjesërisht përmbytjen masive me komente rreth çështjes në fjalë dhe i dha dorë të balaconte sentimentin negativ me atë pozitiv, me ndihmën e mbështetësve besnikë dhe kompanive të paguara. Për më tepër, u parandalua rreziku i asocimit të figurës së kryeministrit me tragjedinë/krimin, dhe mbetjes së këtij asocimi në historinë digjitale. Komentet e mbetura mund të pastrohen ose filtrohen në një moment të dytë nga ekipi kryeministror, sikurse ka ndodhur më herët.
Reagimi zyrtar rreth tragjedisë u komunikua vetëm në kanalin e Twitter me audiencë elitare ose ndërkombëtare, por shumë pak i rrahur nga segmenti i prekur nga tragjedia, të cilit ky mesazh i drejtohej.
Me shpërndarjen më tej në media, u krijua një hendek, një hallkë sigurie, një distancë më shumë, mes kryeministrit dhe indinjatës publike.
Situatat e krizës kërkojnë nga ekspertët e komunikimit dhe PR-it vendimarrje të vështira, ku zgjidhja është thjesht e keqja më e vogël. Në kazusin tonë kombëtar, ekipi kryeministror vlerësoi si të keqen më të vogël indinjatën publike për “fshehjen” e kryeministrit, dredhitë në komunikim dhe mosmarrjen e përgjegjësisë përballë audiencës së tij të rregullt, në kanalin parësor. Kjo indinjatë edhe mund ta detyrojë kryeministrin të ndërrojë strategji në një moment të dytë me vëmendje disi të fashitur, pa ia hequr vlerat zgjedhjes së parë.
Në kohë krize në kompanitë tuaja, rikujtoni këtë kazus kaq familjar për secilin prej nesh sot. Përjetimi personal i gjithsecilit shërben si një lloj busull në det të trazuar. Sa kushton përballja dhe marrja e përgjegjësisë? Sa fitojmë nga mjegullimi dhe shpërqëndrimi i vëmendjes?
Si studjuese e audiencave masive, nuk pozicionohem për strategjinë e duhur pa një studim të thelluar që vlerëson dëmet afatshkurtra dhe afatgjata në imazh; ndoshta kryeministri ka zgjedhur strategjinë e duhur për interesat e tij të mbajtjes së pushtetit. Individualisht, interesat e e mia si qytetare dhe ato të kryeministrit bien ndesh, kryekëput, sot e mot.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
