Pas një viti me rritje të vrullshme, çmimi i arit ka shënuar një rënie të lehtë, duke krijuar një dritare të rrallë për ata që ende nuk kanë investuar në këtë metal të çmuar. Në fund të marsit, një ons ar kushtonte 3,123.44 dollarë, ndërsa dje (7 prill) është 3,030.90 dollarë, një rënie prej gati 3% në më pak se një javë.
Ndonëse nuk është një ndryshim dramatik, çdo lëvizje në çmimin e arit është strategjike, veçanërisht për investitorët fillestarë. Me çmimin që mund të bjerë edhe më tej, shumë po pyesin, a është tani momenti për të blerë ar?
Ekspertët japin tri arsye bindëse pse përgjigjja mund të jetë “po”:
Lexo gjithashtu: BusinessMag.al në Milano Design Week: Midis artit, teknologjisë dhe bashkëpunimeve që frymëzojnë
- Ari tenton të rritet me kalimin e kohës
Pavarësisht rënies së fundit, historia tregon se çmimi i arit, në përgjithësi, ka tendencë të rritet në afatgjatë. Prandaj, çdo ulje, sado e vogël, është një mundësi. Investitorët që hyjnë tani, mund të përfitojnë nga një pikë hyrjeje më e përballueshme, duke i paraprirë një rritjeje që shumë mendojnë se mund ta çojë çmimin e arit mbi 3,500 dollarë për ons.
- Diversifikimi i portofolit është thelbësor
Në kohë të paqëndrueshme ekonomike, si tani, kur tregjet e aksioneve lëkunden, inflacioni vijon, dhe normat e interesit mbeten të larta, ari ka qenë gjithmonë një “strehë e sigurt”. Ai ruan vlerën kur monedhat dobësohen ose kur asetet e tjera bien.
Për investitorët që kërkojnë stabilitet dhe mbrojtje nga rreziqet e tregut, ari ofron një alternativë të besueshme.
Lexo gjithashtu: “Nice News”, si e ktheu Sean Devlin një ide të thjeshtë në një sukses me 1 milion abonentë?
- Kjo mund të jetë një nga herët e fundit për të investuar me këtë çmim
Në janar 2024, një ons ar kushtonte rreth 2,063.73 dollarë. Që atëherë, ai ka pësuar një rritje të qëndrueshme. Me zhvillimet ekonomike që mund të ndodhin çdo moment, përfshirë raportin e ri të inflacionit për muajin mars që publikohet së shpejti, çmimi i arit mund të kapërcejë sërish rekorde.
Nëse nuk e shfrytëzoni këtë moment, mund të detyroheni të hyni në treg në një pikë shumë më të lartë më vonë.
Rënia aktuale e çmimit të arit mund të jetë një mundësi e artë për fillestarët, për të hyrë në treg me një çmim më të ulët se zakonisht. Megjithatë, ekspertët këshillojnë që ari të përbëjë jo më shumë se 10% të portofolit tuaj të përgjithshëm, për të mos e mbingarkuar me një aset që nuk gjeneron të ardhura aktive si aksionet apo obligacionet.
Nëse e keni menduar ndonjëherë të investoni në ar, ndoshta është koha të veproni tani, para se çmimi të ‘‘fluturojë’’ sërish.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
