Prej kohësh në botën e zhvillimit të softuerit dhe menaxhimit të projekteve qarkullon një aksiomë klasike, “Shpejt, mirë ose lirë, zgjidh vetëm dy.” Kjo ide, e njohur si “Trekëndëshi i hekurt” i projektit, ka qenë një lloj udhërrëfyesi për profesionistët që përpiqen të balancojnë tre elementët themelorë të zhvillimit, cilësinë, kohën dhe koston. Por në një treg që ndryshon çdo ditë dhe ku inovacioni është gjithçka, gjithnjë e më shumë njerëz po sfidojnë këtë model të kufizuar, duke treguar se po, është e mundur të arrish një produkt të shpejtë, të mirë dhe të lirë, nëse ndjek qasjen e duhur.
Lexo gjithashtu: Si ta njohësh vlerën tënde në punë? Mësimi që Shaq na jep të gjithëve
Kjo “treshe e pamundur” prej kohësh ka funksionuar si një metaforë për zgjedhje të vështira. Nëse e do produktin të mirë dhe të lirë, përgatitu të presësh gjatë. Nëse e do shpejt dhe mirë, do të të kushtojë. Dhe nëse e do shpejt dhe lirë, ndoshta nuk do jetë aq cilësor sa duhet. Por realiteti është më kompleks se kaq. Në praktikë, përpjekja për të kontrolluar këto tre vlera shpesh çon në ndërlikime dhe rezultate të kundërta nga ato që priten. Dhe është pikërisht këtu ku futet në lojë metoda lean.
Sipas Rafawl Van Coppenolle, drejtor produkti në Nexapp, përqafimi i verbër i këtij trekëndëshi mund të dëmtojë produktin. “Nëse pret shumë nga buxheti, koha ose përmbajtja, cenohet integriteti i produktit,” shpjegon ai. Rruga nuk është thjesht në ndarjen e prioriteteve, por në fleksibilitet dhe komunikim të qartë që vendos pritshmëri të shëndosha që nga fillimi.
Për shembull, të zhvillosh diçka shpejt dhe lirë do të thotë zakonisht të sakrifikosh cilësinë. Krijohet një prototip i pranueshëm, nis marrja e reagimeve, por rreziku është që konsumatorët të zhgënjehen nga përvoja e parë. Dhe siç thotë Salome Mikadze, bashkëthemeluese e Movadex, “përdoruesit nuk harrojnë përvojën e pare, nëse është e keqe, nuk ka kthim mbrapa.”
Lexo gjithashtu: Punonjës më të lumtur, kosto më të ulëta! Apo thjesht një iluzion?
Nga ana tjetër, nëse përpiqesh të zhvillosh diçka të mirë dhe lirë, përgatitu për një rrugë të gjatë. Mund të arrish cilësi pa shpenzime të mëdha, por procesi do të jetë i ngadaltë, dhe në një treg që kërkon reagim të shpejtë, kjo mund të jetë një dobësi fatale. Madje edhe kur përpiqesh të zhvillosh diçka të mirë dhe shpejt, çmimi i lartë shpesh rezulton në dështim, jo për shkak të kostos, por për shkak të kompleksitetit që sjellin burimet e shumta në një ekip. Thjesht, më shumë njerëz nuk do të thotë gjithmonë më shpejt, ndonjëherë do të thotë më ngadalë dhe më konfuz.
Kjo është arsyeja pse shumë sipërmarrës dhe zhvillues produktesh po shikojnë përtej trekëndëshit tradicional, drejt qasjes lean, një metodologji që përqafon gabimin, thjeshtësinë dhe mësimin e vazhdueshëm. Lean Startup, koncept i zhvilluar nga Eric Ries, e sheh produktin jo si një përfundim të përkryer, por si një hipotezë për t’u testuar. Dhe testimi fillon që në ditën e parë, me krijimin e një MVP-je, Minimum Viable Product, që nuk është perfekt, por është i mjaftueshëm për të nisur mësimin.
Mësimi është i qartë, trekëndëshi i hekurt mund të jetë një model i mirë për të nisur diskutimin, por nuk është ligj i pandryshueshëm. Nëse di të dëgjosh tregun dhe vepron me zgjuarsi, mund të ndërtosh një produkt që është i mirë, i shpejtë dhe i lirë. Gjithçka që duhet është një mendësi e hapur, një qasje lean dhe guximi për të sfiduar “rregullat”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English