Inteligjenca artificiale që mund të përputhet me aftësitë njerëzore në çdo detyrë është ende larg nga realizimi – por është vetëm çështje kohe derisa të bëhet realitet, sipas CEO-s së Google DeepMind.
Gjatë një konference në zyrat e DeepMind në Londër të hënën, Demis Hassabis u shpreh se beson se inteligjenca artificiale e përgjithshme (AGI) – që është po aq inteligjente ose edhe më shumë se njerëzit – do të fillojë të shfaqet në pesë deri në dhjetë vitet e ardhshme.
“Mendoj se sistemet e sotme janë ende shumë pasive dhe kanë ende shumë gjëra që nuk mund të bëjnë. Por gjatë pesë deri në dhjetë vitet e ardhshme, shumë nga këto aftësi do të dalin në pah dhe do të fillojmë të lëvizim drejt asaj që quajmë inteligjencë artificiale e përgjithshme,” tha Hassabis. Ai e përkufizoi AGI-në si “një sistem që mund të shfaqë të gjitha aftësitë e ndërlikuara që kanë njerëzit.” “Ende nuk kemi arritur atje. Këto sisteme janë mbresëlënëse për disa detyra specifike, por ka ende shumë gjëra që nuk mund të bëjnë, dhe përpara kemi ende shumë punë kërkimore për të bërë,” shtoi ai.
Ende ka rrugë për të bërë
Hassabis parashikon një periudhë më të gjatë për arritjen e AGI-së, krahasuar me disa prej kolegëve të tij në industri. CEO i kompanisë kineze të teknologjisë Baidu, Robin Li, vitin e kaluar u shpreh se beson që AGI është më shumë se 10 vjet larg, duke hedhur poshtë parashikimet e disa drejtuesve të tjerë që flasin për një kohë më të shkurtër për këtë zhvillim. Nga ana tjetër, Dario Amodei, CEO i startup-it të AI Anthropic, tha për CNBC gjatë Forumit Ekonomik Botëror në Davos se pret që një formë e AI që është “më e mirë se pothuajse të gjithë njerëzit në pothuajse të gjitha detyrat” të shfaqet brenda “dy ose tre viteve të ardhshme.” Disa drejtues të tjerë të teknologjisë e shohin AGI-në duke mbërritur edhe më shpejt. Shefi i Produkteve i Cisco, Jeetu Patel, tha për CNBC gjatë ngjarjes Mobile World Congress në Barcelonë se “ka një shans që një shembull i AGI të shfaqet qysh këtë vit.” “Ka tre faza kryesore të AI-së,” shpjegoi Patel. “Fillimisht është AI bazike, të cilën po e përjetojmë tani. Pastaj kemi inteligjencën artificiale të përgjithshme, ku aftësitë kognitive përputhen me ato të njerëzve. Dhe në fund kemi atë që quhet superinteligjencë.” “Mendoj se do të shohim prova të qarta të AGI-së në vitin 2025. Nuk po flasim për vite larg,” shtoi ai. “Ndërsa superinteligjenca, në skenarin më të mirë, mund të jetë vetëm disa vite larg.”
Lexo edhe: AI dhe kriza e energjisë – Pse kursimi nuk mjafton për një zgjidhje të qëndrueshme?
Çfarë nevojitet për të arritur AGI-në?
Hassabis tha se sfida kryesore për të arritur AGI-në është aftësia e AI-së për të kuptuar kontekstin e botës reale. Edhe pse tashmë janë zhvilluar sisteme që mund të analizojnë probleme dhe të përfundojnë detyra në mënyrë të pavarur – si në rastin e lojërave komplekse strategjike si Go – sjellja e kësaj teknologjie në botën reale po rezulton më e vështirë. “Pyetja është, sa shpejt mund të përgjithësojmë idetë e planifikimit dhe sjelljen agentike (të pavarur), duke përfshirë planifikimin dhe arsyetimin, dhe pastaj t’i zbatojmë këto në botën reale, duke u bazuar në modele të botës – pra modele që mund ta kuptojnë mjedisin përreth nesh,” tha Hassabis. “Mendoj se kemi bërë përparime të mëdha me modelet e botës gjatë dy viteve të fundit,” shtoi ai. “Tani pyetja është, cila është mënyra më e mirë për t’i kombinuar këto modele me algoritmet e planifikimit?”
Sistemet AI me shumë agjentë: Hapi i radhës
Hassabis dhe CEO i divizionit të cloud computing të Google, Thomas Kurian, thanë se të ashtuquajturat sisteme AI me shumë agjentë janë një avancim teknologjik që po fiton shumë vëmendje në prapaskenë.
Si shembull, Hassabis përmendi punën e DeepMind në trajnimin e agjentëve të AI për të mësuar të luajnë lojën strategjike Starcraft.
“Kemi punuar shumë në këtë drejtim me lojën Starcraft, ku kemi një shoqëri agjentësh, ose një ligë agjentësh, të cilët mund të konkurrojnë ose të bashkëpunojnë,” tha ai.
Kurian shtoi se një aspekt i rëndësishëm është komunikimi midis agjentëve të AI. “Kur mendoni për komunikimin midis agjentëve, ne po punojmë për të lejuar një agjent të shprehë veten… Cilat janë aftësitë e tua? Çfarë lloj mjetesh përdor?”
“Të gjitha këto janë elementë të nevojshëm për të bërë të mundur që një agjent të mund të bëjë pyetje dhe të marrë përgjigje, dhe më pas agjentët e tjerë të komunikojnë me të,” shtoi ai.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
