Panairi “Ditët e Bujqësisë” rikthehet në edicionin e tij të katërt më 23-25 Prill në Lushnje, me mbështetjen e Ministrisë së Bujqësisë dhe Zhvillimit Rural, Bashkisë Lushnje dhe shumë institucioneve, organizatave ndërkombëtare dhe kompanive private. Ky panair, me pjesëmarrjen e mbi 100 kompanive jo vetëm nga e gjithë Shqipëria, por edhe nga vende si Hollanda, Gjermania, Greqia etj., mirëpret mijëra vizitorë të interesuar për t’u njohur me zhvillimet më të fundit në sektor.
Ftojmë mediat që ndjekin zhvillimet ekonomike të jenë të pranishme në hapjen e ditës së parë të panairit, më 23 Prill, ora 09:00, që do të nisë me përshëndetjet e ambasadorëve të Hollandës dhe Gjermanisë. Këtë vit, panairi gëzon mbështetjen e veçantë të Ambasadës së Vendeve të Ulëta, e cila ka mundësuar pjesëmarrjen e nëntë kompanive nga Hollanda, që vijnë për të eksploruar mundësi të reja bashkëpunimi dhe investimi në sektorin bujqësor shqiptar. Po ashtu, mbështetja e organizatave ndërkombëtare si GIZ Albania, Helvetas, UNDP dhe FAO nënvizon rëndësinë që ky event ka në nivel kombëtar dhe rajonal.
Mediat e pranishme do të kenë akses për intervista me përfaqësues të kompanive ndërkombëtare, aktorë të tregut vendas dhe përfaqësues institucionalë, si dhe mundësi të ndjekin nga afër diskutimet mbi temat më sfiduese dhe aktuale të sektorit.
Objektivat kryesorë të panairit janë: nxitja e bashkëpunimeve të reja në bujqësi, rrjetëzimi profesional midis fermerëve, kompanive dhe institucioneve, si dhe informimi mbi temat strategjike për të ardhmen e bujqësisë: teknologjitë e reja, bujqësia e qëndrueshme, certifikimet dhe standardet ndërkombëtare.
Gjithashtu, nëpërmjet forumeve dhe paneleve tematike, do të trajtohen çështje si: sfidat e certifikimit për eksport, roli i teknologjisë në uljen e kostove të prodhimit, ndikimet klimatike, dhe aksesimi i fondeve për zhvillim rural.Fokus i veçantë i këtij edicioni është fuqizimi i brezit të ri në bujqësi. Përmes shembujve të suksesit, inovacionit dhe qasjes ndaj financimit, “Ditët e Bujqësisë” synojnë të frymëzojnë të rinjtë që ta shohin bujqësinë si një mundësi moderne dhe afatgjatë për zhvillim personal dhe ekonomik, duke i inkurajuar të investojnë energjinë e tyre në vendin e tyre dhe jo jashtë tij.
Nën moton “Kultivo të Ardhmen”, “Ditët e Bujqësisë” vijnë si një organizim me standarde ndërkombëtare, që synon të shtojë vlerë reale për të gjithë pjesëmarrësit – fermerë, kompani, institucione dhe qytetarë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
