Bizneset që prodhojnë vetë energjinë elektrike nga burime alternative do kenë mundësi t’ia kalojnë atë OSHEE. Bëhet fjalë për biznese që kanë vendosur panele diellore apo shfrytëzojnë erën. Sipas Ministres së Energjitikës, në fund të vitit OSHEE do bëjë balancën e energjisë se shpenzuar dhe asaj të kthyer në rrjet.
Kjo është një kërkesë e hershme e biznesit. Me rritjen e çmimeve të energjisë elektrike shumë prej tyre u janë drejtuar alternativave të tjera si impiantet fotovoltaike për të ulur kostot e faturës, por tepricat e prodhimit shkojnë dëm. Ministrja e Energjisë, Belinda Balluku u shpreh se ndryshimet ligjore do të hyjnë në fuqi nga 1 janari 2023.
Në takim me përfaqësuesit e biznesit u kërkua edhe subvencionimi i çmimit për bizneset që e marrin energjinë në treg të lirë. Tashmë çmimi i blerjes së energjisë për to është 31.29 lekë kWh. Ndërsa, për bizneset në tension të mesëm çmimi qëndron në 18.26 lekë kWh.
Sipas tyre konkurrenca po bëhet e padrejtë pasi në industri të njëjta paguhen çmime të ndryshme energjie, gjë që mund të sjellë falimentimin e shumë kompanive. Thjeshtimi i procedurave burokratike për marrjen e lejeve të paneleve diellore ishte një tjetër kërkesë e bizneseve, që pritet të shqyrtohet.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
