Të gjithë e dimë ndjesinë e zakonshme për të ripërtërirë veten. Por shpesh përqendrohemi vetëm tek ushtrimet fizike, dieta dhe meditimet, ndërsa harrojmë një faktor po aq të rëndësishëm për shëndetin tonë: artin dhe krijimtarinë.
Studimet e fundit tregojnë se aktivitetet artistike si këndimi, vallëzimi, vizatimi, leximi apo vizitat në galeri dhe teatro, mund të përmirësojnë dukshëm shëndetin mendor dhe fizik. Pjesëmarrja e rregullt në art ndihmon në reduktimin e ankthit, depresionit dhe stresit, ndërsa përfitimet mund të jenë edhe parandalues. Për shembull, njerëzit që frekuentojnë rregullisht ngjarje kulturore kanë gjysmën e rrezikut për t’u prekur nga depresioni.
Lexo edhe:Baboon Delivery, 10 vite më pas: historia e një startup-i shqiptar që nuk u dorëzua
Për trurin, aktivitetet artistike funksionojnë si një ushtrim i plotë: forcojnë lidhjet mes pjesëve të ndryshme të trurit, rrisin rezistencën ndaj plakjes dhe krijojnë atë që njihet si “rezervë kognitive” kundër demencës.
Edhe për trupin, arti nuk është thjesht estetik: këndimi dhe vallëzimi përmirësojnë funksionin e mushkërive, ul presionin e gjakut dhe nivelet e glukozës, ndërsa angazhimi në art ndihmon në uljen e inflamacionit dhe ruajtjen e shëndetit fizik.
Ekspertët sugjerojnë disa mënyra të thjeshta për të integruar artin në jetën e përditshme:
– Gjej një burim kreativ që të ngre humorin: dëgjo muzikë apo lexo libra, duke shmangur shpërqendrimet.
– Zgjidh një hobi të ri artistik: vizatim, shkrim krijues, modelim ose instrumente muzikore. Mjafton 30–60 minuta në javë për të parë përmirësime brenda pak javësh.
– Vizito ekspozita dhe ngjarje kulturore: kushto kohë për të vëzhguar dhe reflektuar mbi artin, jo vetëm për pak sekonda.
– Dëgjo muzikë për të përmirësuar ushtrimet fizike: ritmi i muzikës motivon lëvizjet dhe rrit performancën.
– ‘Shfreno’ imagjinatën: loja dhe aktivitetet kreative zhvillojnë fleksibilitetin mendor dhe aftësinë për të përballuar ndryshimet e papritura në jetë.
Siç thekson Daisy Fancourt në librin e saj “Art Cure: The Science of How the Arts Transform Our Health”, përvojat artistike mund të jenë një “lajm i mirë për trurin dhe trupin”, shpesh më të fuqishme sesa trajtimet tradicionale të shëndetit mendor. Nëse deri më tani e keni parë artin si luks, koha është të ndryshoni perspektivën dhe ta bëni pjesë të rutinës tuaj të përditshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
