Arjan Sala, heroi mes nesh - Business Magazine Albania

Arjan Sala, heroi mes nesh

Arjan Sala

Për tre ditë, fotoja me shikimin drejt në sy të Arjan Salës na preku të gjithëve. Punonjësi i kompanisë private të sigurimit u bllokua mes flakëve që përpinë magazinën e qendrës tregtare në Tiranë, pasi kishte nxjerrë 20 punonjës. Flakët që nuk shuheshin dhe tymi i padepërtueshëm rritën ankthin e familjes dhe njëkohësisht të gjithë shqiptarëve. 32 vjeçari, baba i një fëmije të vogël, nuk po gjendej dhe shpresat për ta shpëtuar të gjallë u shuan ditën e tretë të kërkimeve, me 27 Mars, kur u gjet trupi i pajetë.

Pamjet e regjistruara nga kamerat e sigurisë konfirmuan praninë e “Heroit mes nesh”. Arjani vraponte të futej në zonën e rrezikut për të shuar flakët dhe për të nxjerrë punonjësit. Zjarri ishte më i madh se guximi i tij, por, sigurisht guximi dhe përgjegjesia e tij ishin ndër më të lartat që mund të gjenden mes mesh. Kjo e bëri atë heroin mes nesh dhe tashmë edhe zyrtarisht heroi i popullit.

Këshilli i Ministriave e shpalli Salën “Dëshmor i Atdheut” me motivacionin “Humbi jetën në përpjekje për të shpëtuar popullsinë në rast fatkeqësie”. Çmimi iu dorëzuar familjes nga Kryeministri Edi Rama gjatë një vizite në familje.

Pak ditë më parë, Presidenti i vendit Ilir Meta, i akordoi pas vdekjes “Dekoratën e Artë të Shqiponjës”. Meta theksoi se, “Mes dhembjes, por me mirënjohjen dhe krenarinë e çdo shqiptari i akordova sot Heroit Arjan Sala, pas vdekjes, “Dekoratën e Artë të Shqiponjës”, “Në shenjë vlerësimi e respekti të thellë për heroizmin e pashoq në përmbushjen e detyrës për të shpëtuar jetën e shumë qytetarëve. Për sakrificën dhe vetëflijimin e tij sublim, me të cilat hyri në zemrat tona, si shembull i heroizmit dhe humanizmit”.

Aktet heroike janë gjithnjë mbresëlënëse, por në realitetin e sotëm, ky veprim vjen në një kohë kur çdonjëri po rend drejt diçkaje që nuk ka në fokus kujdesin për tjetrin. Vendi është në prag zgjedhjesh dhe palët politike prej muajsh po rendin drejt fitores. Fushata elektorale shpesh shkon përtej normave qytetare duke kaluar në komente dhe ofendime personale.

Kompani pranë pushtetit rendin drejt sigurimit të avantazheve përfshirë tendera, madje edhe individë që rendin drejt suksesit me çdo kusht. Në të gjitha këto raste, nuk merret parasysh dëmi që shkaktohet përreth, në shoqëri. Këtë lloj rendje nuk arriti ta ndalë as pandemia, e cila në vetvete na tregoi se më shumë se paratë dhe sukseset, vlen kujdesi për tjetrin. Në këtë epokë konsumizmi, konceptet e përgjegjshmërisë dhe altruizmit janë dobësuar gati në zhdukje. Kjo bëri që Arjani, të cilësohej si heroi mes nesh edhe nga qytetarët.

Sigurisht një reagim i tillë deri në vetëflijim, nuk është i rastësishëm. Çdokush që mund të jetë ndalur për ta menduar këtë koncept e ka kuptuar se ai është edukuar për të qenë i tillë.

Daljet publike të familjes e vërtetuan këtë. Xhaxhai dhe vëllai i tij, na prezantuan një familje të thjeshtë, të përulur dhe plot vlera. Një model që fatkeqësisht e shohim rrallë në televizor e në mediat online, ndaj dhe bën përshtypje djali që nuk mendoi për veten në moment rreziku, por për të tjerët.

Arjan Sala, sot është heroi për të cilin të gjithë kishim nevojë. Kishim nevojë të ndriçojë udhëtimin tonë të përgjegjësisë në shoqëri, në punë. Ai lindi dhe u rrit në periferi të Tiranës për t’u bërë publik përmes këtij akti, që tejkalon përmasat kombëtare. Sakrificat e tij deri në vetëflijim e bëjnë atë një hero global të shoqërisë së sotme.

Ky artikull u publikua në median rajonale okruzenje.net  nga kryeredaktorja e businessmag.al Albana Mucaj

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #26 - Korrik 2021

Ditët e nxehta të kësaj vere mund t’i freskoni me artikujt e revistës 26 të Businessmag. Një numër i pasur me artikuj rreth sipërmarrjeve në fusha të ndryshme, por edhe profileve interesante të sipërmarrësve. Që në kopertinë vini re dy djem që po çojnë përpara sipërmarrjen e ngirur nga prindërit. Një model për t’u ndjekur nga shumë sipërmarrje të tjera. Idetë e reja, nismat e reja në biznes sot janë më të rëndësishme se kurrë për të mundësuar suksesin.
Zhvillimet në disa tregje mund t’i gjeni në brendësi të revistës. Të tilla janë tregjet e real estate dhe ai i shërbimit postar.

Zhvillimet në fushën e teknologjisë këtë vit vijnë me 10 gjetjet më të rëndësishme teknologjike, të cilat janë orientuar shumë drejt zhvillimeve shëndetore.

Diaspora vjen me profilin e një sipërmarrëseje në fushën e stilimit dhe qepjes së veshjeve. Ornela ka arritur të hapë tre dyqane shërbimi, ku përshtaten brandet më të mëdha sipas nevojave të klientit.

Edukimi është një temë e prekur nga ne në këtë numër, pasi sfidat e edukimit në këtë vit pandemik kanë qenë të mëdha. Sjellim dy akademi me zhvillimet e tyre dhe qasjen ndaj edukimit gjatë pandemisë, si dhe mundësinë e edukimit të fëmijëve në format më të mira të mundshme.

Në brendë…

Shiko më shumë
Na ndiqni në rrjetet sociale
0