Jo pak herë kemi lexuar e dëgjuar për të rinj të apasionuar pas artit, por arti në të cilin janë fokusuar Ariola dhe Imarion Ziraj, është pothuajse i rrallë. Të bësh art me gozhdë, është një punë e veçantë.
Për BusinessMag.al ata na rrëfejnë se si lindi ideja për t’u marrë me këtë lloj arti. Fillimisht filluan eksplorimin në fushën e artit, një fushë aq e bukur dhe komplekse. Ata janë tërhequr gjithmonë nga e bukura, ndjesitë që përcjellin ngjyrat dhe misteret e tablove. Për ta energjia e artit është pozitive dhe frymëzuese, por ky pozitivitet nuk është vetëm për ata që e shikojnë dhe shijojnë artin, por edhe për ata që e krijojnë. Artëdashësit dhe miqtë e studios, nuk ngurrojnë t’u përcjellin entuziazmin dhe lumturinë për veprat e tyre, çka i motivon për të dhënë maksimumin nga vetja. Arti i tyre gëzon një emër të veçantë, Zamu. Për ta emri Zamu është deformimi i fjalës Muza. Ky art është një “rebelim” i artit të mirëfilltë pamor. Arti që zhvillohet në Zamu, është një formë e ndërthurjes së pikturës dhe materies (gozhdë dhe fill). Produkti final është një tablo druri shumëngjyrëshe me reliev, e cila është e bazuar në një tematikë të caktuar.
“Frymëzimi dhe krijimtaria janë dy nga bashkëpunëtorët tanë më të mirë. Çdo punim realizohet me shumë përkushtim dhe dashuri për të dhururar sado pak copëza lumturie”, -shprehen ata për BusinessMag.al.
Prodhimet e tyre shpesh janë në formën e dhuratave për të afërmit për raste ditëlindjesh, përvjetoresh apo festa diplomimi. Por, një kategori tjetër e produktit, shkon për personat që janë të interesuar për të kryer ndërhyrje në interierin e bizneseve të tyre, ose në ambiente familjare. Ky kategorizim klientësh shënon dhe një rritje të Zamu, një evoluim produkti, teknike nga druri në mur por edhe në materiale të tjera.
Lexo: Endi dhe Babeta, vëlla e motër të apasionuar pas “handmade”
Ashtu si çdo i ri tjetër që vendos të hyjë në fushën e biznesit edhe Ariola me Imarionin kanë hasur vështirësi, të cilat nuk kanë qenë vetëm nga pikëpamja financiare, por edhe në pjesën e marketingut. Ata janë prezantuar vetë tek konsumatori me një produkt, i cili ishte tërësisht i panjohur për ta. Prandaj shprehen se fillimisht duhej të ishin të qartë se kujt do t’i shërbenin. Për këtë iu erdhi në ndihmë pjesëmarrja në një program akselerimi biznesi, organizuar nga “YSB Balkans”, ku njohuritë e marra mbi sipërmarrjen ishin të çmueshme, frytdhënese dhe u përkthyen në punë të vazhdueshme.
Mbështetja më e madhe për ta ka qenë familja dhe miqtë e afërt. Zamu ka tashmë dy vite në treg dhe risitë që kanë sjellë kanë mundësuar zhvillimin e biznesit. Ata kanë një mesazh për të gjithë ata që duan të guxojnë në fushën e sipërmarrjes.
“Ashtu siç kemi ndërtuar mundësitë për të krijuar diçka kaq të veçantë, mund t’a bëjë cilido person, i cili ka vullnetin idenë dhe përkushtimin për të ndërmarrë një risk të caktuar. Nëse gjithçka bëhet me punë të palodhur, këmbëngulje dhe pasion, atëherë çdo gjë është e mundur, çdo gjë mund të arrihet.
