Një çmim historik për asetet më të vjetra të sigurisë në botë sinjalizon dobësim të besimit ndaj dollarit dhe rritje të presionit mbi Rezervën Federale të SHBA.
Të martën, ari u ngjit në një rekord prej 3,508.50 dollarë (3,015.08 euro) për ons, i nxitur nga pritshmëritë për një ulje të normës së interesit nga Rezerva Federale dhe rritja e pasigurisë për investitorët. Ky metal i çmuar shihet tradicionalisht si një strehë e sigurt për investitorët, ndaj kërkesa për të shtohet ndjeshëm sa herë që besimi tek monedhat e letrës apo stabiliteti i tregjeve financiare bie.
Më herët këtë vit, çmimi i arit pati një kërcim të ndjeshëm pasi presidenti i SHBA, Donald Trump, shpalli një sërë tarifash të diskutueshme ndaj vendeve të tjera.Rekordi i arit thekson shqetësimin e thellë për perspektivën globale dhe vë në pikëpyetje pavarësinë e Rezervës Federale, në një kohë kur Trump po rrit presionin mbi politikëbërësit.
Rritja e çmimit të arit është pjesë e një rritjeje shumëvjeçare të metaleve të çmuara. Bankat qendrore nga Azia në Lindjen e Mesme kanë përshpejtuar blerjet e tyre për të katërtin vit radhazi, duke i dhënë një shtysë të fuqishme çmimeve. Parashikimet flasin për të paktën 1,000 tonë ar që do të blihen nga qeveritë për rezervat e tyre.
Ky orientim pasqyron një mbështetje gjithnjë e më të vogël tek dollari amerikan, në një kohë kur situata fiskale e Uashingtonit dhe betejat politike e kanë zbehur statusin e tij si monedhë rezervë botërore.
Lexo edhe: NATO në krizë? Liderët europianë “nën urdhrat” e Trump-it
Një sondazh i Këshillit Botëror të Arit me 73 banka qendrore tregoi se 95% e tyre planifikojnë të shtojnë rezervat e arit brenda 12 muajve të ardhshëm, ndërsa gati tre të katërtat parashikojnë të zvogëlojnë rezervat në dollarë.
Kina, e cila vijon negociatat me SHBA për një marrëveshje tregtare më të favorshme, ka grumbulluar ar çdo muaj, duke shënuar muajin e nëntë rresht me blerje në korrik.
Nga Bretton Woods deri sot
Për pjesën më të madhe të historisë moderne, monedhat kombëtare ishin të lidhura direkt me arin: qeveritë garantonin që paratë e letrës mund të shkëmbeheshin për një sasi fikse ari në rezervat shtetërore.
Pas Luftës së Dytë Botërore, në konferencën e Bretton Woods në Nju Hempshër, u krijua FMN dhe Banka Botërore, ndërsa dollari amerikan u fiksua në 35 dollarë për ons ar. Ky standard i dha dollarit një besueshmëri të pakrahasueshme, pasi SHBA mbante pjesën më të madhe të rezervave botërore të arit.
Ky sistem i dha stabilitet tregtisë dhe investimeve globale për 27 vjet, deri më 1971, kur presidenti Richard Nixon ndërpreu konvertueshmërinë e dollarit në ar, duke shënuar rënien e Bretton Woods.
Që prej asaj kohe, vlerat e monedhave përcaktohen nga tregjet valutore ndërkombëtare, ku bankat, tregtarët dhe qeveritë blejnë e shesin në kohë reale.
Sot, politikat amerikane po ndikojnë sërish tek blerjet e arit nga bankat qendrore. Simbolika është e fuqishme: çmimi i arit ka kapërcyer 3,500 dollarë për ons, një rritje mbi 10,000% nga standardi prej 35 dollarësh i Bretton Woods pas Luftës së Dytë Botërore.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
