Spanja po thellon hetimin e saj kundër gjigantit teknologjik Apple, duke ngritur shqetësime serioze se kompania mund të jetë duke ushtruar sjellje anti-konkurruese në treg.
Komisioni Kombëtar i Tregjeve dhe Konkurrencës në Spanjë (CNMC) nisi për herë të parë hetimin në korrik 2024, duke akuzuar Apple për “vendosje të kushteve të padrejta tregtare” ndaj zhvilluesve të aplikacioneve që shiten përmes platformës së saj App Store. Rregullatori deklaroi se Apple mund të jetë duke “abuzuar me pozitën e saj dominuese në treg”.
Të martën, CNMC njoftoi se do ta zgjerojë hetimin për shkak të “provave të reja” që tregojnë se kompania kërkon nga zhvilluesit të ndjekin një skemë çmimesh të përcaktuar nga vetë Apple në mënyrë që të lejohet publikimi i aplikacioneve të tyre në App Store.
“Sjellje të tilla përbëjnë kufizim të konkurrencës mes ndërmarrjeve”, tha rregullatori spanjoll, duke theksuar se kjo praktikë përbën shkelje të ligjeve të Bashkimit Evropian.
Komisioni ka një vit kohë për të përfunduar hetimin dhe theksoi se zgjerimi i tij “nuk paragjykon rezultatin përfundimtar”.
Apple i ka mohuar akuzat, duke deklaruar vitin e kaluar se “zhvilluesit spanjollë të të gjitha përmasave konkurrojnë në kushte të barabarta në App Store”.
Lexo edhe: Nvidia porosit 300 mijë çipë H20 nga TSMC, pas rritjes së kërkesës në Kinë
Ky hetim i autoriteteve spanjolle vjen në vazhdën e dy procedurave të ngjashme të nisura më parë nga Komisioni Evropian. Vitin e kaluar, Komisioni i BE-së e gjobiti Apple me më shumë se 1.8 miliardë euro në një rast që kishte të bënte me aplikacionet për transmetim të muzikës në iPhone dhe iPad.
Sipas Komisionit, Apple kishte vendosur kufizime për zhvilluesit, duke i ndaluar të informonin përdoruesit për mundësitë e abonimeve më të lira që ofroheshin jashtë aplikacionit – në shkelje të rregullave të BE-së për “ndalimin e devijimit të konsumatorit”.
Në prill të këtij viti, Komisioni njoftoi mbylljen e një tjetër hetimi mbi shkeljet e mundshme të Aktit për Tregjet Digjitale (DMA), pasi Apple ra dakord të lehtësonte mënyrën se si përdoruesit ndryshojnë cilësimet e paracaktuara për shfletuesit, thirrjet, mesazhet dhe më shumë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
