Alibaba ka prezantuar për herë të parë një palë syze inteligjente të fuqizuara nga inteligjenca artificiale, syzet Quark AI, të emërtuara sipas asistentit të saj virtual. Pajisja u shfaq për publikun në Konferencën Botërore të Inteligjencës Artificiale (WAIC) në Shanghai. Edhe pse kompania nuk ka zbuluar ende çmimin apo datën e lançimit, është konfirmuar se produkti është i zhvilluar plotësisht dhe pritet të dalë në tregun kinez brenda këtij viti.
Syzet janë projektuar për të funksionuar ngushtë me ekosistemin në rritje të AI-së së Alibaba-s dhe ofrojnë veçori të avancuara si përkthim në kohë reale, pagesa pa duar, krahasime çmimesh dhe navigim turn-by-turn, të gjitha të aksesueshme direkt përmes lenteve. Kjo është përpjekja e parë e Alibaba-s në tregun e syzeve inteligjente dhe koha e lançimit nuk është rastësi. Konkurrentët vendas si Xreal dhe Rokid kanë prezantuar tashmë produktet e tyre, ndërsa gjigantë globalë si Meta janë të pranishëm me syzet inteligjente Ray-Ban. Në vend që të qëndrojë jashtë vëmendjes, Alibaba duket e vendosur të konkurrojë duke shfrytëzuar asetet e veta strategjike , modelet e veta AI, platformat softuerike dhe shërbimet ekzistuese si Alipay dhe Taobao. Syzet Quark AI do të përdorin platformën Snapdragon AR1 të Qualcomm-it, një çip i ndërtuar posaçërisht për pajisje të realitetit të shtuar. Brenda tyre është integruar edhe një procesor i dytë me konsum të ulët energjie, ndërsa sistemi operativ është i dyfishtë: Android dhe një Sistem Operativ në Kohë Reale (RTOS), i cili menaxhon detyrat e lehta dhe të menjëhershme në mënyrë efikase.
Lexo edhe: Çfarë është “kriza e heshtur” në vendin e punës?
Gjatë vitit të fundit, Alibaba ka rritur ndjeshëm përfshirjen e saj në fushën e AI-së. Në muajin shkurt, kompania njoftoi një investim prej 53 miliardë dollarësh në infrastrukturë për AI përgjatë tre viteve. Gjithashtu, ajo ka riorganizuar ekipet e brendshme për të përqendruar më shumë fokusin tek modelet gjuhësore dhe produktet praktike, përfshirë zhvillimin e modeleve të veta të mëdha të gjuhës me emrin Qwen, që fuqizojnë veçoritë e ndryshme të Quark, asistentit të saj AI. Më herët këtë vit, Alibaba e transformoi Quark nga një aplikacion i thjeshtë kërkimi dhe ruajtjeje cloud në një asistent gjithëpërfshirës me funksione të krahasueshme me ChatGPT apo Google Gemini. Po ashtu, partneriteti me prodhuesin e syzeve AR RayNeo, për integrimin e teknologjive të AI-së në produktet e tij, tregon se Alibaba ka një vizion afatgjatë për këtë sektor.
Në aspektin e funksioneve, syzet Quark AI ofrojnë më shumë sesa një pamje futuriste. Përdoruesit mund të:
-
Skanojnë kode QR për pagesa përmes Alipay
-
Identifikojnë dhe krahasojnë çmime në Taobao thjesht duke i drejtuar syzet drejt produkteve
-
Përdorin navigimin në kohë reale për ecje apo çiklizëm me ndihmën e aplikacionit Amap
-
Bëjnë telefonata pa përdorur duart, marrin transkriptime të takimeve live, dëgjojnë muzikë dhe përdorin kamerën e integruar.
Nga ana e dizajnit, kompania ka punuar edhe për rehatinë e përdorimit. Krahët e syzeve janë 40% më të hollë se standardi i industrisë, ndërsa kornizat janë të lehta dhe të dizajnuara për të integruar të gjithë këtë teknologji pa u dukur të rënda apo të bezdisshme për përdorim të përditshëm.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
