Albina Peposhi është vetëm 17 vjeç, në vitin e tretë të gjimnazit. Ajo ka nisur të mësojë programim që kur ishte 12 vjeç dhe vazhdimisht ka marrë pjesë në aktivitete të ndryshme sfiduese si olimpiada të informatikës dhe workshop-e apo hackathone virtuale si brenda ashtu edhe jashtë Shqipërisë. Madje ajo ka fituar vendin e parë, në olimpiadën zhvilluar në Durrës “Unë dhe Kompjuteri”.
Talenti dhe pasioni për teknologjinë ka bërë që ajo t’i përkushtohet dhe të mësojë çdo ditë gjëra të reja dhe të jetë pjesë e pandashme e konkurseve të ndryshme.
Por Albina e ka kthyer talentin dhe pasionin e saj në punë, ku aktualisht punon part-time si back-end developer për një kompani në Poloni dhe pjesërisht fullstack developer për një kompani në Amerikë.
“Fokusi im është gjithashtu në arritjen e rezultateve të larta në shkollë, olimpiadat e informatikës, sport dhe aktivitetet e tjera jashtë ekraneve, me qëllim balancimin e angazhimeve në rutinën time ditore,” thotë Albina për BusinessMag.
Lexoni: Albina Peposhi, fiton medaljen e parë në olimpiadën “Unë dhe kompjuteri”
Ndërsa për organizimin e ditës së saj ajo përdor programe si Notion, apo Pomodoro Timer, ku cakton detyrat për të bërë, si në punë ashtu dhe në shkollë sipas prioritetit dhe orarit.
“Padyshim që jo gjithmonë dita ime është produktive e kodi nuk funksionon siç duhet dhe kjo është në rregull. Bëj pushime të shkurtra, mund të dal të marr ajër të pastër apo thjesht të gatuaj diçka, për të larguar mendjen për disa minuta, dhe për t’u kthyer me energji të re,” thotë ajo.
Albina përpiqet të balancojë dhe të vendosë prioritetet kur bëhet fjalë për mënyrën sesi organizon ditën e saj.
Një mirëorganizim kërkon shumë disiplinë dhe ndonjëherë dita nuk është produktive, mirëpo bej pushime të shkurtra. Del të marrë ajër të pastër, merret me sport apo thjesht gatuan diccka, për të larguar mendjen për disa minuta, dhe për t’u kthyer me energji të re. “Ndonjëherë ndërrimi i ambientit mjafton për t’u fokusuar sërish”, sipas saj.
Para pak kohësh ajo ishte mes nxënësve që zhvilluan takim me kryeministrin. Takimi erdhi nga mbledhja “Rinia për Rininë”, organizuar nga Ministrja për Rininë dhe Fëmijët dhe Kryeministri. Nxënësit ekselentë të Durrësit ishin ftuar për të dhënë ide rreth zhvillimit të rinisë dhe zgjidhjes së problematikave aktuale. “Ideja ime ishte e fokusuar rreth informatikës, zhvillimit të kësaj fushe në vendin tonë. Tregu ekonomik ka nevojë për më shumë programues, rinia jonë ka shumë potencial, dhe mendoj që shfrytëzimi i mundësive për të kualifikuar të rinjtë, si dhe krijimi i politikave financiare, të cilat mundësojnë lehtësimin e nisjes dhe zhvillimit të startup-ve, janë zgjidhja më e mirë. Kështu mendoj që njëkohësisht edhe vendi ynë do të kishte një zhvillim të madh në sektorin e teknologjisë”, thotë Albina. Takimin e dytë e zhvilloi në Tiranë, ku u ftua të ishte speaker për hapjen e eventit për buxhetin e shtetit 2022 për rininë. Fokusi i fjalimit të saj ishte në profesionalizimin dhe kualifikimin e nxënësve e studentëve në fushën e IT dhe krijimi i më shumë eventeve për zbulimin e talenteve dhe mbështetjen e tyre.
Pasionet e Albinës janë të shumta. Në punë, ajo merret me teknologji të ndryshme si AWS, NodeJS, GraphQL, ReactJS, Gatsby, MongoDB, TailwindCSS etj,. Me këto teknologji ajo punon edhe në projekte personale. Një pjesë të mirë të kohës së lirë e shpenzon duke u përgatitur për Olimpiadat Kombëtare të Informatikës dhe me disa projekte të vogla me Arduino dhe microcontrollers, ku përdor gjuhën e programimit C++. Një fushë e teknologjisë me shumë interes për të është Machine Learning dhe IA. Për to ka nisur kurse gjatë verës, mirëpo me fillimin e shkollës dhe ngarkesave të tjera, e ka lënë mënjanë përkohësisht. Për sa u perket aktiviteteve “jashtë ekraneve”, ajo merret me vrap, minimalisht 4 herë në javë, pasi është mënyra më e mirë e shkarkimit të ngarkesës emocionale që ajo ka.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
