Këshilli Ndërkombëtar i Aeroporteve në gjithë botën u bashkua me shumicën e linjave ajrore në thirrjen për një zgjedhje midis testimit ose vaksinimit, nga frika se një rregull i tillë para fluturimit do të ishte po aq përçarës sa karantinat. Qantas Airways nxiti debatin javën e kaluar kur tha se vaksinimi ndaj COVID-19 do të ishte i nevojshëm për pasagjerët në fluturimet e saj ndërkombëtare. Por linjat e tjera ajrore, dhe tani aeroportet globale, janë të shqetësuar për faktin se pritja e vaksinave do të ndalojë njerëzit të udhëtojnë derisa ato të përhapen gjerësisht, duke dëmtuar kështu biznesin në rajone, të tilla si Europa.
“Ashtu siç karantina ndaloi ndjeshëm industrinë, një kërkesë universale për vaksinat mund të bënte të njëjtën gjë,” tha për Reuters Drejtori i Përgjithshëm i Këshillit Ndërkombëtar të Aeroporteve Luis Felipe de Oliveira.
LEXO: Pandemia, Kina propozon një mekanizëm global për të lehtësuar udhëtimet
“Ndërsa ne mirëpresim zhvillimin e shpejtë të vaksinave, do të ketë një periudhë të konsiderueshme përpara se ato të jenë vënë gjerësisht në dispozicion,” shtoi ai.
“Industria nuk mund të presë derisa vaksinimi të bëhet i disponueshëm në të gjithë botën. Gjatë periudhës së tranzicionit, testet dhe vaksinat së bashku do të luajnë një rol kryesor në rimëkëmbjen e industrisë”
Australia është nga ato vendet e para që ka përcaktuar që njerëzit që vijnë nga jashtë do të duhet të vaksinohen ose të izolohen në një numër të kufizuar të hoteleve.
