Gjysma e të gjitha punëve do të kryhen nga robotët deri në vitin 2025, duke sjellë kështu një ndryshim që mund të përkeqësojë pabarazinë, ka parashikuar një raport i Forumit Ekonomik Botëror.
Grupi hulumtues tha se një “revolucion robotik” do të krijojë 97 milionë vende pune në të gjithë botën, por do të shkatërrojë pothuajse po aq, duke lënë në rrezik disa komunitete.
Punët rutinë ose manuale në administratë dhe përpunimi i të dhënave janë më të kërcënuarat nga automatizimi, tha WEF (World Economic Forum). Por do të hapen vende pune të reja në ekonominë e gjelbër, kujdesin shëndetësor, të dhënat e mëdha, etj. Hulumtimi i Forumit përfshiu 300 nga kompanitë më të mëdha në botë, të cilët punësojnë tetë milionë njerëz në të gjithë botën.
Lexoni: Parashikimet për rritjen e shitjeve të pajisjeve teknologjike në 3 mujorin e katërt të 2020
Robotët do të zëvendësojnë 20 milionë vende punë në fabrikë
Më shumë se 50% e punëdhënësve të anketuar thanë se ata prisnin të shpejtonin automatizimin e disa roleve në kompanitë e tyre, ndërsa 43% thanë se kishin gjasa të shkurtonin vendet e punës për shkak të teknologjisë.
WEF tha se pandemia ka përshpejtuar përdorimin e teknologjive të reja ndërsa firmat kërkuan të ulnin kostot dhe të përshtateshin me mënyra të reja të punës. Por WEF paralajmëroi se punëtorët tani përballen me një kërcënim të dyfishtë nga “automatizimi i përshpejtuar dhe pasojat nga recesioni Covid-19”.
“Këto gjëra kanë thelluar pabarazitë ekzistuese në të gjithë tregjet e punës dhe kanë përmbysur fitimet në punësim, të bëra që prej krizës financiare globale në 2007-2008,” tha Saadia Zahidi, drejtori menaxhues në WEF.
“Është një skenar i dyfishtë përçarje që paraqet një pengesë tjetër për punëtorët në këtë kohë të vështirë. Dritarja e mundësisë për menaxhim proaktiv të këtij ndryshimi po mbyllet shpejt.”
Rritja e kërkesës
WEF tha se aktualisht rreth një e treta e të gjitha detyrave në punë kryhen nga makineritë dhe njerëzit bëjnë pjesën tjetër, por deri në 2025 ekuilibri do të zhvendoset.
Rolet që mbështeten në aftësitë njerëzore si këshillimi, vendimmarrja, arsyetimi, komunikimi dhe bashkëveprimi do të rriten në kërkesë. Do të ketë gjithashtu një “rritje” të kërkesës për punëtorë për të mbushur vende pune në ekonominë e gjelbër dhe role të reja në fusha si inxhinieri dhe informatika cloud.
Por sipas raportit, miliona punë rutinë ose manuale do të zëvendësohen nga teknologjia, duke ndikuar më së shumti në punëtorët më pak të paguar, me aftësi më të ulta.
WEF tha se miliona punonjës do të duhet të rikualifikohen për të përballuar ndryshimin, ndërsa qeveritë do të duhet të sigurojnë “rrjeta më të forta sigurie” për njerëzit që do të mbeten pa punë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
