Fermat që premtojnë për të ardhmen

Nëse deri dje njerëzit që jetonin në fshat apo merreshin me bujqësi paragjykoheshin, sot edhe pse vitet po kalojnë dhe shoqëria po evoluon, një paragjykim i tillë duket se nuk zë vend më në shoqëri. Gjithmonë  e më shumë po ndërtohen ferma në Shqipëri, në qytete të ndryshme dhe në zonat periferike të kryeqytetit.Këto janë ferma jo shumë të dëgjuara dhe të përhapura për vendin ku jetojmë. Me pak fjalë, janë ferma që premtojnë për të ardhmen, për vetë krijuesit e tyre dhe për ekonominë e vendit. Një fermë Aloe Vera e ndërtuar nga një djalë i ri, një fermë aquaponike, ndër të paktat në Shqipëri, një e tillë hidroponike, fermë medicinale dhe fermë kërmijsh. Një pjesë e mirë e këtyre fermave janë 100% bio.

Albi Sulo ka ndërmarrë një biznes. Kultivimin e Aloe Veres. Ai ka ngritur një serë me 4000 rrënjë Aloe Vera, të cilat u përkasin variteteve të ndryshme. Në serën e tij po kultivohet një prej llojeve të Aloe Verës me shumë vlera. Bima e Aloe Verës, përveçse ka disa varietete, ka nevojë për faktorë të ndryshëm atmosferikë. Risia që Albi sjell në Shqipëri është fakti se, po e kultivon këtë bimë në tokë, ndërsa deri më tani ne e mbillnim në vazo. Për tregtimin e gjetheve të bimës ai ka lidhur marrëveshje me biznese vendase, të cilat i përdorin ato për të prodhuar kremëra, scrube dhe maska.
Lexo:  Albi Sulo dhe biznesi i tij me Aloe Vera

Inxhinier Jani Taçi ka zgjedhur të zhvillojë një fermë Aquaponike. E gjeni në fshatin Haskolie, jo shumë larg kryeqytetit. Aquaponik Albania mban emrin ferma e inxhinierit. Aquaponia është produkt i integrimit të dy sistemeve, Hidroponi + Akuakulturë. Sistemi akuaponik ështe një sistem me cikël të mbyllur të qarkullimit të ujit. Nga vaska e peshqve uji rrjedh në shtretërit e bimëve, i pastruar e i filtruar nga bimët rikthehet te peshqit. Kërkohet monitorim i cilësisë së ujit kryesisht përsa i përket PH, i cili duhet të jetë rrotull neutrales.
Lexo:  Jani Taçi, inxhinieri që i’u përkushtua fermës Aquaponike

Ina Nanaj krijuese e një ferme Hidroponike në vendin tonë. Nisi si çdo biznes me shpirt dhe pasion të madh…nisi nga nevoja e produkteve organike në treg, bashkëvepruar me eksperiencën e fituar prej vitesh në këtë fushë. Ferma “HidroFarm” është një projektim i dy personave të lindur dhe shkolluar në qytet dhe specializuar në këtë fushë, ku shpirti i punës dhe bashkimi nga i njëjti vizion krijoi një fermë të vogël. Ferma është e ndarë në dy pjesë, në 2000 m² serë e mbuluar dhe e kompletuar me sistemet përkatëse për të siguruar një habitat të shëndetshëm për bimët dhe 2000 m² fushë e hapur e organizuar kjo për mbjellje sipas sezonit dhe ambjenti i kafshëve.
Lexo: Ferma që mund ta keni edhe në shtëpinë tuaj

Naturalalba është ferma e ngritur në pllajat pranë kepit të Rodonit. Kompania e kultivimit të bimëve medicinale ka tashmë një shtëpi të madhe, ngjitur me shtëpinë e prindërve të Sokol Projës në Lalëz. Dy ortakët, njëri shqiptar dhe tjetra italiane, investuan pak në blerjen dhe montimin e një makinerie, që pritet ta ndryshojë kapacitetin dhe rendimentin e punës së këtij biznesi. Rigoni, melisa, mentha longifolia, mirto e rusco janë bimët e preferuara nga klientët e huaj, jo vetëm në vendet e BE e në Zvicër, por edhe në Kinë, me disa dhjetra tonelata në muaj.
Lexo:  Ferma medicinale shqiptare, një sipërmarrje që po nxit zhvillimin e ekoturizmit

Ervin Hajdaraga është i riu nga Tirana me profesion psikolog në QSUT, por me një pasion të madh për sipërmarrjen. Sipërmarrja që ai ka zgjedhur të investojë nuk është e zakontë për vendin tonë. Vetëm pak herë mund të kemi dëgjuar për një fermë kërmijsh. Ferma“Elix Snail” gjendet në Durrës, në zonën e Sukthit, pranë stacionit të trenit. Krijimi i një ferme për kultivimin e kërmijve ishte e rastësishme.
Lexo:  Psikologu që po zhvillon biznesin e kërmillit