BE planifikon ndalimin e produkteve plastike

Mjetet plastike, pipëzat, lugët e kafes dhe kunjat për pastrimin e veshëve shumë shpejt do ta kenë të vështirë të hyjnë në Europë. Komisioni Europian paraqiti një projekt-direktivë që synon dëbimin e produkteve një-përdorimshme, në luftë kundër mbetjeve plastike.

Komisioni Europian propozoi rregulla të reja për BE-në që synojnë të reduktojnë ndotjen plastike në qytete dhe oqeane duke ndaluar produkte të ndryshme plastike.

Çfarë propozon drafti?

• Ndalim i përdorimit të produkteve plastike si pipëzat, pjatat plastike, lugët plastike të kafes, pastruesët e veshit dhe mbajtëset plastike të tullumbaceve.
• Frenimi i përdorimit të gotave plastike për pijet, si dhe kontejnerët e plastik.
• Prodhuesit e produkteve të caktuara do të kërkohen të mbulojnë shpenzimet e pastrimit dhe trajtimit të mbeturinave, duke përfshirë: produktet e duhanit me filtra (të tilla si bishtat e cigareve), qese plastike, mbështjellëset e karameleve, qeset e patatinave dhe letrave të lagura.
• Fashat e mestruacioneve, letrat e lagura dhe tullumbacet do të kërkohet të shtojnë një etiketë që tregon se si produkti duhet trajtuar pas përdorimit.
• Çdo shtet anëtar duhet të përdorë një sistem depozitimi ose një masë tjetër për të mbledhur 90% të shisheve plastike të përdorura në vendin e tyre deri në vitin 2025.
• Një rritje e informacionit për konsumatorin në lidhje me rreziqet e paketimeve plastike.

BE shpreson të shmangë zemërimin e konsumatorit mbi ndryshimet e mundshme duke edukuar publikun për alternativat miqësore me mjedisin.

Nënkryetari i BE Frans Timmermans e vlerësoi projekt-direktivën, duke thënë: “Mbetjet plastike janë padyshim një çështje e madhe dhe europianët duhet të veprojnë së bashku për të trajtuar këtë problem, sepse mbeturinat plastike përfundojnë në ajrin tonë, tokën tonë, oqeanet tona dhe në ushqim.”

Qeveria gjermane sinjalizoi miratimin e këtij plani të Komisionit Evropian. Ministrja e Mjedisit Svenja Schulze, tha se “produktet plastike me një përdorim” duhet kenë një zgjidhje në nivel europian dhe gradualisht të nxirren jashtë qarkullimit”.

Direktiva e propozuar tani do të shkojë në Parlamentin Evropian dhe Këshillin Evropian për miratim. Nëse direktiva miratohet, shteteve anëtare të BE-së do t’i jepet një afat kohor për t’iu përshtatur ndryshimeve. Zyrtarët e Komisionit të BE-së i kërkuan institucioneve të “japin rezultate të prekshme” përpara zgjedhjeve të BE në dymbëdhjetë muaj.

/TheGuardian